Post #3769

Кітаптар — салықсыз! Қазір ғана жұмыс тобының отырысында біз үшін маңызды шешім қабылданды: енді отандық кітаптар мен оларды басып шығару қызметтері 16% қосылған құн салығынан (ҚҚС) босатылады. Бұл жай ғана салықты алып тастау емес. Бұл — терең мағынасы бар қадам. Кітап — тауар емес. Кітап — білімнің, мәдениеттің, тарихтың және ұлттың болашағының кілті. AMANAT партиясының фракциясы мен біздің Әлеуметтік-мәдени даму комитеті осы бағытта табанды түрде жұмыс істеді. Біздің ұсынысымызды Үкімет те өз қорытындысында қолдады. Бұл бастама Мемлекет басшысы Қ. К. Тоқаевтің оқу мәдениетін дамыту жөніндегі үлкен бағдарламасымен толық үндеседі. Әлемнің көптеген елдерінде кітаптар салықтан босатылған. Тіпті керісінше, мемлекет баспаларды қолдап, субсидия беріп, кітаптарды халық үшін қолжетімді етуге тырысады. Өйткені қазіргі кезде идеялар мен мағыналар үшін нағыз күрес жүріп жатыр. Бүгін кітапқа салынған инвестиция — елдің рухани тәуелсіздігі мен бәсекеге қабілеттілігіне салынған инвестиция.