Post #3911

Обуначилардан бири қуйидаги иқтибосда “патрон”лар деганда нимани тушуниш кераклигини сўраб қолди: Нигде ничто не ждет человека. Всегда все надо приносить с собой. И еду, и патроны. — Генерал-лейтенант Павел Судоплатов. Заметки к «Руководству по партизанской войне» Аслида, Павел Судоплатов бу гапларни гапирмаган ҳам бўлиши мумкин, лекин бунинг мавзуга аҳамияти йўқ. Судоплатов ОГПУ/НКВД/НКГБ структураларида фаолият кўрсатган ўз даврининг етук разведчиги, диверсанти бўлган, ОУН раҳбари Евгений Коновальц ва Лев Троцкийларнинг ўлдирилишини ташкил қилган, 1947 йилда Мустафо Барзонийнинг отрядлари Эрондан Совет Иттифоқига қочганда уларни Тошкент атрофига жойлаштирган, шу орқали Қурдистон озодлик ҳаракатига аралашган ва ҳоказо ва ҳоказо. Яъни, ушбу шахс патронлар ҳақида гапирганида айнан патронларни тушунишимиз керак. Қурол-яроқ ҳамда уларнинг ўқ-дориси жуда катта аҳамиятга эга. Империялар айнан милтиқ (автомат) ва пулеметлар ёрдамида қурилади. Бу ҳақида ҳеч қандай иллюзия бўлмаслиги керак. Юрий Мороз қайтарадиган нарса — “ҳақиқат моддийдир”. Воқеликнинг ўзгартириш учун қурол-яроқ керак. Кўз олдимиздаги мисол — Туркия қачондан ривожлана бошлади, ўзининг пистолети, автомати, пулемети, дрон ва танкларини ишлаб чиқара бошлаганидан кейин. Бекорга Селчук Байрактарни кейинги президент бўлади, деб таҳмин қилишмаяпти. Бизнинг тарихимизда ҳам қурол-яроқ кўп нарсани ҳал қилган: 1917 йилда большевиклар Тошкентда ҳокимиятни қўлга кирита олгани ҳам (маҳаллий кучларнинг ўқ отар қуроли бўлмаган), водийдаги арман хунрезликларида ҳам… Усмонли арман террористларига берилган тўппончалар эса ўша даврда автомобилдан қимматроқ бўлганини эслайлик. Етук давлатлар милтиғини сотса ҳам, унинг махсус патронининг экспортини назорат остида ушлайди, чунки қурол деганда, қурол-яроқ ва унинг патронлари комплекси тушунилади. Ўзи нима учун бундай савол пайдо бўлди? Сабаби, биз қурол-яроқ маданиятидан анча узоқлаштирилганмиз. Ўша Россия босиб олганидан кейин бизга рус тили ўргатилмагани каби, Чор Россияси даврида армияга ҳам олинмаганмиз; советлар пайтида ҳам стройбат асосий йўналишимиз бўлган.