Post #5128

ТАРЖИМА Исломга қарши уруш, аслида, сизга қарши урушдир. Мусулмонлар ва Исломни қоралашга қаратилган, ўн йиллаб давом этиб келаётган бу улкан, миллиардерлар молиялаштириб келаётган кампания ниҳоятда мураккаб ва ҳар томонлама ишланган. У анъанавий ОАВни ҳам, пул тўланадиган машҳур шахслару сиёсатчиларни ҳам қамраб олади ва бугунги кунда замонавий тарихда энг кўп ҳужжатлаштирилган қирғин кампанияларидан бирига мафкуравий ниқоб бўлиб хизмат қиляпти. Икки ярим йил давом этган очиқ инсон қурбонлиги, истило “ҳуқуқи” ҳақида мақтанишлар, ҳануз шунга мухлислик қилаётган одамлар, уй-жойидан бомба билан қувиб чиқарилган беш-олти миллион инсон, юз мингдан ошган тинч аҳоли қурбонлари — бу тарғиботнинг ҳақиқий нишонлари айнан сизсиз. $2,3 триллионга тушган, 20 йиллик Афғонистон фожиаси шунчаки ҳавога учиб кетгани йўқ. Бу пул қурол сотувчиларга, ёлланма жангчиларга, сиёсий кампанияларга, пудратчиларга ва қурилиш компанияларига кетди. Камида яна $3 триллионга тушган Ироқ фалокати, Хиллари Клинтон бош-қош бўлган Ливияга аралашув ва уни гуллаб-яшнаган давлатдан очиқ қул бозорига айлантириш учун сарфланган яна $1,5 миллиард ҳам оз сонли бир гуруҳни бойитишга хизмат қилди. Энди эса Эронни бомбалашга қаратилган, глобал иқтисодиётни издан чиқараётган яна бир даҳшатли уруш кампанияси борки, бу Исроилнинг этник тозалаш амалиёти қаршиликсиз давом этиши учун керак, холос. Бунинг “бошланғич нархи” $50 миллиард, кейин эса кунига яна $2 миллиард. Бунинг барчаси нима учун? Бу на “Ғарб цивилизациясини сақлаш”, на кимнидир хавфсиз қилиш учун. Агар шундай бўлганида, АҚШдаги ҳар бир фуқаро учун умуммиллий тиббий суғурта, ҳар бир талаба учун ўн йиллик бепул давлат коллежи, миллионлаб болалар учун боғча тизими яратиш мумкин эди. Рейган давридан бери емирилиб келаётган ҳар бир мактаб, йўл, кўприк ва шифохонани қайта тиклаш мумкин эди. Ҳатто бутун сайёрани озиқ-овқат билан таъминлаш, уй-жой дастурларини кенг жорий этиш ва гўё жуда қайғураётгандек кўринадиган миграция инқирозининг илдизига ечим топишга ҳам етарди. “Ғарб цивилизацияси” деган тушунчанинг ўзи иллюзия. Шарқсиз Ғарб бўлмайди. Бу худди ясси ер назариясидек бир сохта ғоя. Насронийликнинг ўзи Яқин Шарқ дини. Фалсафа, математика, илм-фан, астрономия ва тиббиёт Африкадан чиққан. Инсон яратган барча технологиялар турли маданиятлар сув каби бир-бирига аралашиб, ўзгариб, ўсиб ва қайта шаклланиб турадиган сайёрада пайдо бўлган. Исломий қадриятларга қарши қўйиладиган алоҳида “яҳудий-насроний қадриятлар” деган нарса йўқ. Бу бир хил илдиздан чиққан динлардир. Агар сиз шу динлардан бирортасига амал қилсангиз, бир хил тилда гапирганингизда Худо учун ҳам, “салом, сизга тинчлик бўлсин” деган ибора учун ҳам бир хил сўзлардан фойдаланасиз. Бутун сайёра аҳолисининг ярми Иброҳимдан таралган битта диннинг уч шохобчасидан бирига мансуб. Унинг ўзагида эса битта асосий таълимот бор: “Юртингизга бир мусофир келиб қўшилса, унга зулм қилманг. Уни маҳаллий одам каби тутинг ва уни ўзингизни севганингиздек севинг”. Шарқ ва Ғарб тўқнашуви деган нарса йўқ; бу инсониятнинг ўзига қарши чизилган даҳшатли карикатура холос.