Post #1372

Замонавий иккикураш, уч кураш ва тўрткураш бўйича Ўзбекистон чемпионати якунланди. 2021 йилнинг 19-22 август кунлари Тошкент шаҳрида замонавий иккикураш, учкураш ва тўрткураш бўйича Ўзбекистон чемпионати бўлиб ўтди. Унда Тошкент шаҳри, Андижон, Қашқадарё, Тошкент ва Сурхондарё вилоятларидан 120 нафар спортчи иштирок этди. 20 август куни U-11, U-13, U-15 ёш тоифасида 65 нафар бошловчи спортчилар иккикурашнинг сузиш ва югуриш йўналишлари бўйича қатнашди. 21 август куни учкурашнинг сузиш ва лазер-ран (лазер тўппончасидан ўқ отишни ўз ичига олган югуриш) йўналишлари бўйича 55 нафар тажрибали спортчилар мусобақалашди. 22 август куни қиличбозлик бўйича мусобақалар ўтказилиб, уларда 17 та энг кучли спортчилар маҳоратини намоён қилди. Тақдирлаш маросимида Ўзбекистон Замонавий бешкураш Федерацияси раиси Газиев Бахромжон Валиевич, Ўзбекистон Республикаси Миллий гвардия Тошкент шаҳар бошқармаси бошлиғи полковник Ахмедов Атамурад Бахтиярович, қишки ва мураккаб техник спорт турлари бўйича РОСММ директори Юсупов Азимжон Ражаповичлар фахрий меҳмон сифатида иштирок этди.