Мирзо Кенжабек ижодхонаси

* * * ПОЛВОН Ўзбекистоннинг миллий паҳлавони – Турсун Али Муҳаммад Полвонга бағишлов Ўғлонларим, зинҳор билинг, бас, Фақат тош кўтарган полвон полвонмас, Мусибатни, кулфатни енгиб, Истибдодни, зулматни енгиб, Эл ичра бош кўтарган – полвон! Юрса кимдир чўкиб, сарғариб, Вафо излаб, бир дўст ахтариб, Инсон бўлиб, дунёда ғариб Бир кўнгилни кўтарган – полвон! Фақат тош кўтарган полвон полвонмас, Мағрурланмай жасад кучига, Ўз ғамини ютиб ичига, Эл ғамини кўтарган – полвон! Давр ҳақнинг ўткир ва синмас Тишларига тош осиб турса, Гурзи билан полвоннинг эмас, Ҳақиқатнинг кўксига урса, Даст кўтариб ҳақнинг туғини, Ҳаққа чорлаб, халқнинг руҳини Токи меърож кўтарган – полвон! Фақат тош кўтарган полвон полвонмас. Шовқин-сурон қилаётганлар – Мусибатни куйлаётганлар, Ишрат билиб ғамимизни ҳам, Кўтармаса битта сўзни ҳам, Раиятнинг қасоси учун Чидаб, Ҳақнинг ризоси учун Мазлум юкин кўтарган – полвон! Фақат тош кўтарган полвон-полвонмас... Аждодларннг қутлуғ либосин Олақуроқ шимга алмашиб, Мисли саҳна масхарабози – Бутун авлод юрса адашиб, Аёл – Кашмир санъати билан Юрт саҳнида ўйнатса илон, Худосини унутса тўқлар Ва белида белбоғи йўқлар, Номус қилиб бу ҳолдан андак, Ор эгнига кийгизиб яктак, Белбоғ боғлаб Номус белига, Ўз касбини бериб ўғлига, Юксак тутиб миллат шаънини, Бошида тож кўтарган – полвон!.. 1988 (1989) Мирзо Кенжабек @m_kenjabek| @xojagon_uz •┈┈• ❀ 🌷☘️🌷 ❀ •┈┈•

* * * «СЕН МУДОМ ОЖИЗУ МАЗЛУМ ТОМОН БЎЛ...» •┈❁✿❁┈• Эй инсон, хоҳ яхши, хоҳи ёмон бўл, Сен мудом ожизу мазлум томон бўл. Баъзан туққанинг ҳам қадрингга етмас, Ўзингнинг бахтингга ўзинг омон бўл!.. Мирзо Кенжабек @m_kenjabek| @xojagon_uz •┈┈• ❀ 🌷☘️🌷 ❀ •┈┈•

* * * ҲАЗРАТИ АБУ ҲОЗИМИ МАККИЙ ҲИКМАТЛАРИ (қуддиса сирруҳу) •┈❁✿❁┈• Менинг назаримда оқил улдурки, қўлига бойлик кирса, севинмагай, қўлидан чиқарса, қайғурмагай. Оқил яна улдурки, икки нарса учун ғам чекмас: Биринчиси ул нарсадирки, ўзи унга келгайдир, келмаса, истамоққа ҳожат йўқдир. Иккинчиси ул нарсадирки, ўзи келадиган эмас, бўлсин дея юз минг жаҳд этса ҳам, у келмас. (Бу икки нарсага ғам чекмоқ дозим эмасдир.) * * * Ундан сўрадилар: Сенинг давлатинг нимадир? – Менинг давлатим Ҳақ ризосидир ва халқдан бениёз (беҳожат) бўлмоқдир. Шайх Фаридуддин Аттор ҳазратларининг "Тазкират ул-авлиё"асаридан. Форс тилидан Устоз Мирзо Кенжабек таржимаси. @m_kenjabek| @xojagon_uz •┈┈• ❀ 🌷☘️🌷 ❀ •┈┈•

* * * «ҚУЁШНИНГ БОРЛИГИ НУРИНГДАН МАЪЛУМ...» •┈❁✿❁┈• Раббим! Не шоҳларни залил қилгансан, Ҳазрат Иброҳимни халил қилгансан. Қуёшнинг борлиги нуридан маълум, Сен нурни сояга далил қилгансан! (Нисо, 125, Фурқон, 45) Мирзо Кенжабек @m_kenjabek| @xojagon_uz •┈┈• ❀ 🌷☘️🌷 ❀ •┈┈•

* * * Ассалому алайкум ва раҳматуллоҳи ва барокатуҳ! БУГУН: Сешанба. Ҳижрий 1447 йил. Зулҳижжа ойининг 9-куни. Милодий 2026 йил 26-май. Ё Раббимиз! Ушбу кунни бизлар учун ва бутун дунё инсонлари учун хайрли қил! Юртимизга ва дунёга доимий тинчликни ато эт! @m_kenjabek| @xojagon_uz •┈┈• ❀ 🌷☘️🌷 ❀ •┈┈•

Ўзбекистон Ёзувчилар уюшмасида шоира, Ўзбекистон Ёзувчилар уюшмаси аъзоси, 2-даражали Соғлом авлод учун ордени соҳибаси Рухсора Оллоёрова таваллудининг 70 йиллигига бағишланган адабий-маърифий анжуман ўтказилди. Анжуманни Ўзбекистон Ёзувчилар уюшмаси раиси, Ўзбекистон халқ шоири Сирожиддин Саййид кириш сўзи билан бошлаб берди. У ўз нутқида шоиранинг китобларидан бирига Шайх Муҳаммад Содиқ Муҳамад Юсуф ҳазратлари сўз боши ёзиб берганини эслади. Ўзбекистон ёзувчилар уюшмаси раиси ўринборасари, шоир Минҳожиддин Мирзо ихтисоси муҳандис бўлган шоиранинг шеъриятда “кўнгил муҳандиси” экани ҳақида сўзлади. Ўзбекистонда хизмат кўрсатган ёшлар мураббийси, Халқаро Бобур мукофоти соҳиби, фахрий профессор, устоз Мирзо Кенжабек шоира фаолиятида Илоҳий муҳаббат мавзулари борлиги, ижоди билан шахсияти мувофиқ келишини таъкидлади. Шоира Рухсора Оллоёрова Ёзувчилар уюшмаси раҳбариятига ва йиғилганларга миннатдорлик билдириб, шеърларидан намуналар ўқиди. @Gulzebo_Ibrohimova

AZIZ ADABIYOT IXLOSMANDLARI! O‘zbekiston Yozuvchilar uyushmasida shoira, nafis qalam sohibasi, uyushma aʼzosi Ruxsora Olloyorova tavalludining 70 yilligiga bag‘ishlangan adabiy-maʼrifiy tadbir o‘tkaziladi. ✨ Kechada: — shoira ijodidan namunalar; — xotira va eʼtiroflar; — sheʼriyat va maʼrifat ufqlari haqida suhbatlar bo‘lib o‘tadi. 📅Sana: 25-may 🕒Vaqt: 15:00 📍Manzil: O‘zbekiston Yozuvchilar uyushmasi Kichik majlislar zali Barchangizni ushbu fayzli adabiy anjumanda kutib qolamiz! O‘zbekiston Yozuvchilar uyushmasi Axborot xizmati

* * * «ҲЕЧ КИМНИ ДЎСТЛИКДАН ЖУДО ҚИЛМАСИН...» •┈❁✿❁┈• Ҳеч кимни дўстликдан жудо қилмасин, Дўстлашган қалблар ҳеч хато қилмасин. Дўстга кўп сир берма, ёвлашиб қолсанг, Бир куни дўст сени расво қилмасин. Мирзо Кенжабек @m_kenjabek| @xojagon_uz •┈┈• ❀ 🌷☘️🌷 ❀ •┈┈•

* * * ҲАЗРАТИ МАВЛОНО ЖАЛОЛУДДИН РУМИЙНИНГ «МАСНАВИЙИ МАЪНАВИЙ» АСАРИДА ҲАЗРАТИ АЛИ ВАСФЛАРИ розияллоҳу анҳу •┈❁✿❁┈• «МЕНИНГ ВУЖУДИМНИНГ ЛАШКАРБОШИСИ АҲАД БЎЛМИШ АЛЛОҲНИНГ ИШҚИДИР». 3797. Кўҳаму ҳастийи ман бунёди Ўст, В-ар шавам чун коҳ, бодам боди Ўст. «Мен тоғман ва мен Яратгувчининг бунёдиман. Агар мен сомон баргидай енгил бўлиб, ҳар томонга учадиган бўсам, мени у ёқ ва бу ёққа учирадиган шамол фақат Ҳақ таолонинг хоҳиш-иродасининг шамолидир». 3798. Жуз ба боди ў нажунбад майли ман, Нест жуз ишқи Аҳад сархайли ман. «Мени фақатгина Ҳақ таоло хоҳиш-иродасининг шамоли ҳаракатга келтиради, мен Ҳақ таоло хоҳиш-иродасининг шамолидан бошқа нарса билан ҳаракат қилмайман. Менинг вужудим лашкарбошиси Ул Аҳад бўлмиш – якка ягона бўлмиш Аллоҳнинг ишқидир». «МЕН АБУ ТУРОБМАН – ТУПРОҚ ТАБИАТЛИМАН…» 3801. Ғарқи нурам, гарчи сақфам шуд хароб, Равза гаштам, гарчи хастам Бу-Туроб. Ҳазрати Али (каррамаллоҳу важҳаҳу – Аллоҳ у кишининг зотини мукаррам айласин): дедилар: «Агар мен зоҳиран вайрон ва хароб бўлсам ҳам, нурга ғарқман. Агар Абу Туроб, яъни тупроқ табиатли бўлсам ҳам, аммо руҳим тароватли ва гулзор кабидир». Абу Туроб Алининг гўзал ва олий лақабларидан биридир. Бу лақабни у зотга лутфан жаноб Расулуллоҳ солаллоҳу алайҳи ва саллам берганлар. Байтнинг маъноси, ҳазрати Сўфи Аллоҳёр айтганларидек: Отанг ердур, санам ердай қилиқ қил, Ёмонлиқ айлаганга яхшилиқ қил!.. Мирзо Кенжабек @m_kenjabek| @xojagon_uz •┈┈• ❀ 🌷☘️🌷 ❀ •┈┈•

* * * «РАББИМ! СЕН РАҲМАТНИ ЗОТИНГГА ЁЗИБ...» •┈❁✿❁┈• Раббим! Сен раҳматни Зотингга ёзиб, Қуръон нозил қилдинг, англадик, кезиб. Лекин Каломдаги эслатмалардан Фақат қалби борлар олгайдир насиб!.. (Анъом, 12; Қоф, 37). Мирзо Кенжабек @m_kenjabek| @xojagon_uz •┈┈• ❀ 🌷☘️🌷 ❀ •┈┈•

#Ғазал_садолари БЎЛҒУСИ Янги тонгданки садолар бўлғуси, Эски ғамларга видолар бўлғуси. Ёр, муҳаббат юртига нурлар ёғиб, Тозаю тоза ҳаволар бўлғуси. Бу ёнишлар ҳурмати, эй дил, сенга Бир саодат ҳам атолар бўлғуси! Не ажабким, чархи даввор айланиб, Дўсту ёрдан ҳам вафолар бўлғуси! Дард элининг бир синиқ кулгуси ҳам Қанча дардингга даволар бўлғуси! Элу юрт қадрини ким хор айласа, Ул ўзи хору гадолар бўлғуси. Толма, Мирзо, одамизот эркига Руҳу жонинг гар фидолар бўлғуси, Сенга Ҳофиздан садолар бўлғуси, Мир Алишердан наволар бўлғуси! 1985 Мирзо Кенжабек @m_kenjabek| @xojagon_uz •┈┈• ❀ 🌷☘️🌷 ❀ •┈┈•

* * * Ассалому алайкум ва раҳматуллоҳи ва барокатуҳ! БУГУН: Душанба. Ҳижрий 1447 йил. Зулҳижжа ойининг 8-куни. Милодий 2026 йил 25-май. Ё Раббимиз! Ушбу кунни бизлар учун ва бутун дунё инсонлари учун хайрли қил! Юртимизга ва дунёга доимий тинчликни ато эт! @m_kenjabek| @xojagon_uz •┈┈• ❀ 🌷☘️🌷 ❀ •┈┈•