Post #23748

🔴 🔱 Бекзат Байхашев: Ана мен бала саулығын сақтау – менің басты құндылығым Бекзат Ерболатұлы Маңғыстау облысы, Бейнеу ауданында дүниеге келген. Ол Ы.Алтынсарин атындағы мектепті тәмамдап, Ақтөбе медицина колледжіне оқуға түседі. Кейін Марат Оспанов атындағы Батыс Қазақстан медицина университетін аяқтайды. «Дәрігерлік жол – оңай сала емес. 15 жылға созылған үздіксіз оқу, кезекшілік, тәжірибе және ұйқысыз түндер. Студент кезімде жедел жәрдем қызметінде санитар және фельдшер болып жұмыс істедім. Дәл сол кезеңде медицинаның қаншалықты үлкен жауапкершілік екенін түсіндім. Медицина – қателікке жол жоқ сала»,– дейді Бекзат Байхашев. Бекзат Ерболатұлы 2021 жылы туған өңіріне оралып, Маңғыстау облыстық перинаталдық орталықта акушер-гинеколог ретінде еңбек жолын бастайды. Қазіргі таңда ол босану бөлімінің меңгерушісі. Сонымен қатар Бейнеу ауданы бойынша акушерлік және гинекология саласына жетекшілік етеді. Санитарлық авиация құрамында болып, шұғыл жағдайларда шалғай елді мекендерге де барады. Дәрігер мамандығын таңдауға анасының ықпалы зор болғанын атап өтті. «Мектеп қабырғасында жүргенде-ақ анам мені болашақ дәрігер ретінде көрді. 9-сыныптан кейін медицина колледжіне түстім. Төрт жыл бойы анам қасымда болды. Мен тек оқуыммен айналысуым үшін ол Бейнеуден Ақтөбеге көшіп келді. Сондықтан дәрігер болып қалыптасуым ең үлкен үлес қосқан анама шексіз алғысымды білдіремін», – дейді ол. Акушер-гинеколог үшін жұмыстағы ең қымбат сәттер – пациенттердің ризашылығы мен оның көмегі арқылы отбасыларға қуаныш сыйлаған мезеттер. Бекзат Байхашев кәсіби білікті маман ғана емес, сонымен қатар отбасында өмірлік жарының тірегі, екі ұл мен екі қызды тәрбиелеп отырған ардақты әке. Осы жылдың мамыр айында олар көпбалалы отбасы атанды. - Менің ойымша, жақсы дәрігер клиникалық ойлай білуі, ұсақ-түйекке мән беруі, жанашыр, жауапты болуы керек. Ол үнемі ізденіп, дамып, ұжыммен жұмыс істей білуі тиіс. Ең бастысы – мейірімді жүрегі болғаны жөн. Дәрігер болу – ең алдымен халыққа қызмет ету. Қазақстан Республикасы Денсаулық сақтау министрлігінің баспасөз қызметі 🖥Ресми сайт gov.kz/memleket/entities/dsm 📱Facebook facebook.com/healthcare.gov.kz 📱Instagram https://instagram.com/healthcare.gov.kz