Post #24257

🔷 ☑КАРДИОЛОГИЯ ЖӘНЕ ІШКІ АУРУЛАР ҒЫЛЫМИ-ЗЕРТТЕУ ИНСТИТУТЫ ЕУРОПАЛЫҚ ҚОҒАМНЫҢ HYPERTENSION EXCELLENCE CENTRE МӘРТЕБЕСІНЕ ИЕ БОЛДЫ Кардиология және ішкі аурулар ғылыми-зерттеу институтына European Society of Hypertension (ESH) — Еуропалық артериялық гипертония қоғамының Hypertension Excellence Centre мәртебесі ресми түрде берілді. Аталған мәртебе институттың артериялық гипертония мен жүрек-қан тамырлары ауруларын диагностикалау, емдеу және профилактика саласындағы жоғары халықаралық стандарттарға сәйкес келетінін растайды. Excellence Centre мәртебесі 2031 жылға дейін жарамды. Hypertension Excellence Centre бағдарламасы — ESH-тің халықаралық бастамасы, ол артериялық гипертония саласында жетекші клиникалық және ғылыми орталықтардың желісін қалыптастыруға бағытталған және мынадай өлшемдерді қамтиды: • артериялық гипертониясы бар пациенттерді қадағалау бойынша жоғары клиникалық сараптамалық деңгей; • ESH/ESC заманауи еуропалық ұсынымдарын күнделікті клиникалық тәжірибеге енгізу; • белсенді ғылыми-зерттеу қызметі; • медицина қызметкерлерінің арасында білім беру жұмысы, сондай-ақ жүрек-қан тамырлары қаупін басқаруда пәнаралық және профилактикалық тәсілді дамыту. Excellence Centre мәртебесі тек қатаң сараптамалық бағалаудан өтіп, Еуропалық артериялық гипертония қоғамы белгілеген сапа өлшемшарттарына тұрақты сәйкестігін дәлелдеген ұйымдарға ғана беріледі. Институтқа аталған мәртебенің берілуі ESH-тің Артериялық гипертония және кардиоваскулярлық профилактика мамандары қоғамымен тығыз ынтымақтастығының нәтижесінде мүмкін болды. Қоғам президенті Гүлнара Джунусбекова мен вице-президенті Мейрамгүл Тундыбаева бұл бағыттағы жұмысты үйлестірді. Hypertension Excellence Centre мәртебесін алу Қазақстанның халықаралық кардиологиялық және профилактикалық қауымдастықтағы позициясын нығайтуға; ESH-тің халықаралық ғылыми және білім беру бағдарламаларына қатысу мүмкіндігін кеңейтуге; артериялық гипертониясы бар пациенттерге көрсетілетін медициналық көмектің сапасын арттыруға; жүрек-қан тамырлары қауіптерін басқаруда профилактика мен дербестендірілген тәсілдің рөлін күшейтуге мүмкіндік береді. Кардиология және ішкі аурулар ғылыми-зерттеу институты клиникалық, ғылыми және білім беру қызметін одан әрі дамытуды жалғастырып, халықтың жүрек-қан тамырлары денсаулығын жақсартуға және Қазақстанда озық еуропалық практикаларды ілгерілетуге үлес қоса береді. European Society of Hypertension — артериялық гипертония, оның профилактикасы және жүрек-қан тамырлары ауруларын бақылау саласындағы сарапшыларды біріктіретін жетекші халықаралық кәсіби ұйым. ESH клиникалық ұсынымдар, білім беру бағдарламалары мен ғылыми бастамалар әзірлейді. Бұл құжаттар әлем дәрігерлері тарапынан кеңінен қолданылады және гипертензия саласындағы заманауи дәлелді медицинаның негізін құрайды. Қазақстан Республикасы Денсаулық сақтау министрлігінің баспасөз қызметі 🖥Ресми сайт gov.kz/memleket/entities/dsm 📱Facebook facebook.com/healthcare.gov.kz 📱Instagram https://instagram.com/healthcare.gov.kz