Post #24554

ҚАЗАҚСТАНДА 2029 ЖЫЛҒА ДЕЙІН ДЕНСАУЛЫҚ САҚТАУДЫ ДАМЫТУДЫҢ ЖАҢА ТҰЖЫРЫМДАМАСЫ ӘЗІРЛЕНДІ ⚜️Жаңа стратегиялық құжат қолжетімді медицинаны қамтамасыз етуге, өмір сүру ұзақтығын арттыруға және заманауи технологияларды енгізуге бағытталған. ⚡️ Қазақстан Республикасы Денсаулық сақтау министрлігі елдің Ұлттық даму жоспары мен Үкімет тапсырмаларын іске асыру шеңберінде 2029 жылға дейінгі денсаулық сақтауды дамыту тұжырымдамасын әзірледі. 📝 Құжат азаматтардың қажеттіліктеріне бағдарланған, тұрақты әрі тиімді денсаулық сақтау жүйесін қалыптастыруға бағытталған ұзақ мерзімді даму бағытын айқындайды. Бұл жүйе халықты толық қамтуды және сапалы медициналық қызметтерге тең қолжетімділікті қамтамасыз етеді. 📌 Тұжырымдама кешенді жүйелі шараларды іске асыруды көздейді. Олардың қатарында интеграцияланған медициналық көмекті дамыту, жаңа буындағы цифрлық шешімдерді енгізу, кадрлық әлеуетті нығайту және медициналық ғылымды дамыту бар. Негізгі мақсат — 2029 жылға қарай күтілетін өмір сүру ұзақтығын 77 жасқа дейін арттыру, сондай-ақ жүрек-қан тамырлары, онкологиялық аурулар, қант диабеті және созылмалы респираторлық аурулар сияқты негізгі инфекциялық емес аурулардан болатын мерзімінен бұрын өлімді төмендету. ✏️ Құжат 9 стратегиялық бағытты қамтиды. Олардың ішінде жаңа буындағы медициналық-санитариялық алғашқы көмекті дамыту, медициналық қызметтердің қолжетімділігін арттыру, жоғары технологиялық және дербестендірілген медицинаны енгізу, дәрілік қамтамасыз етуді күшейту және отандық фармацевтикалық саланы дамыту бар. ✅ Жалпы Тұжырымдаманың шеңберінде 168 іс-шара және нысаналы индикаторлар жүйесі көзделген. Олар республикалық және өңірлік деңгейде іске асырылатын болады. 📍 Тұжырымдама жетекші сарапшылардың, ғылыми қауымдастықтың, медициналық жоғары оқу орындарының, сондай-ақ халықаралық ұйымдардың, оның ішінде Дүниежүзілік денсаулық сақтау ұйымынык, ЮНИСЕФ және ЮНФПА-ның қатысуымен әзірленді. Денсаулық сақтау министрлігінің мәліметінше, Тұжырымдаманы іске асыру медициналық көмектің сапасы мен қолжетімділігін арттыруға, денсаулық сақтау жүйесінің тұрақтылығын нығайтуға және халық денсаулығын одан әрі жақсартуға мүмкіндік береді.