Post #4722

Əvvəllər düşünürdüm ki, bizim siyasətçilər və siyasi fəallar həbsdən qorxurlar, buna görə də öz prinsiplərindən geri çəkilirlər. Lakin zaman keçdikcə gördüm ki, onların çoxusu heç də həbsdən qorxmur, hətta buna hazırdırlar. Buna baxmayaraq, bu illər ərzində Azərbaycanda güclü bir təşkilat ortaya çıxmadı. İndi kütləvi həbslər fonunda insanlar jurnalistlərlə danışarkən "sırada mənəm" deyirlər. Amma bəs, neçə illərdir həbsə hazır olduqlarını söyləyənlər, nəyə görə vahid bir məqsəd ətrafında birləşib güclü bir təşkilat yaratmağa nail ola bilmədilər? Həbsdən qorxmaq məsələsi problemin yalnız bir tərəfidir. Əslində, siyasi fəalların çoxu öz yolunu getməyə üstünlük verir, amma bir məqsəd ətrafında birləşməkdə çətinlik çəkirlər. Bəlkə də hər kəsin fərdi məqsədi, birgə hərəkət etməyə mane olur. Amma belə bir dövrdə, vahid bir ideya və məqsəd ətrafında birləşməkdən başqa yol qalırmı? Bütün bu illər ərzində birləşməkdə çətinlik çəkənlər, nəhayət bir araya gəlməlidirlər, başqa çarə yoxdur.