Post #4733

O gün Taleh Yüzbəyov müsahibəsində qeyd etdi ki, “Azərbaycanda bir filmə baxmaq üçün kinoteatra gedənlərin sayı 150 min nəfər civarındadır”. Müsahibəyə tam baxmamışam və yalnız bu hissəsi maraqlı gəldi (düşündüm ki, əlavə nəsə də deyəcək. Misal üçün, filminin qazancı haqqında və s.). Standart olaraq müsahibənin bu məqamında “Azərbaycan bazarı kiçikdir” söz birləşməsi istifadə olundu. “Azərbaycan bazarı kiçikdir” – mənə daim maraqlı gəlir. Bunu deyən insanlar üçün kiçik və ya böyük bazar nə deməkdir? Yəni müxtəlif sahələrdə bazarların həcmi də bir qədər müxtəlifdir. Yəni avtomobil satışı cəhətindən Azərbaycan bazarı kiçikdir, amma kino sənayesi cəhətindən kiçik hesab etmək çətindir. Müqayisə üçün əhali sayına Azərbaycandan da kiçik olan Norveçi istifadə edə bilərik. Rəsmi olaraq Norveçdə 5,5 milyon insan yaşayır. Azərbaycanda biz bildiyimiz qədər rəsmi 10 milyondur. Eyni göstəriciləri müqayisə etdikdə görürük ki, burada “bazar kiçikdir” anlayışı bir qədər başqa məsələdir. Yəni burada tələbat azdır məsələsi deyil, təklif yoxdur (aşağıdakı cədvəl). Müqayisə üçün Norveçdə 203 kinoteatr və 689 kinozal mövcuddur. Müasir Azərbaycanda kinoteatr şahəsi yaranandan inhisar vəziyyətindədir, amma göstəricilər arasında fərq səkkiz dəfədən çoxdur. Norveçdə kinozallar daha kiçikdir. Amma bunun səbəbi də var. Orada kinozallar bütün ölkə üzrə yayılıb. Bəllidir ki, Ucarda kinozal olsa idi, o da Bakı kinozallarından qat-qat kiçik olacaq idi, amma bilirik ki, Ucarda kinozal yoxdur. Düzdür deyə bilərsiniz ki, Norveçdə insan rifahı daha yüksəkdir. Amma əsas məsələ başqadır. Bakının özündə belə böyük sayda əhaliyə malik və eyni zamanda kinozalları olmayan bölgələr mövcuddur (Yasamal, mikrorayonlar, Hövsan və s.). İnsanlar şəhərin başqa hissəsinə yalnız kinoya baxmaq üçün getməlidirlər. Bu isə, əlbəttə ki, tələbatı da azaldacaq. Niyəsə kino sahəsində çalışanlar düşünürlər ki, insanlar hər hansı bir kinoya görə şəhərin bir tərəfindən başqasına getməlidirlər. Əslinə qalsa kino sadəcə əyləncənin bir növüdür və normal təklifi olmadıqda, əlbəttə ki, rəqabətdə uduzacaq.