Post #4877

İllər boyu müxtəlif ekspertlər Azərbaycan futbolunun problemləri haqqında danışırlar. Onlar infrastruktur məsələsini vurğulayır, uşaq futbolunun inkişafından bəhs edir və ümumiyyətlə, futbolda da hər bir sahədə olduğu kimi elmi əsaslara söykənən yanaşmanın vacibliyini qeyd edirlər. Amma nədənsə, Azərbaycan futbolunda nəinki inkişaf yoxdur, əksinə, geriləmə müşahidə olunur. "Qarabağ" klubunun uğurlarını çıxmaq şərtilə, həm klub səviyyəsində, həm də milli komanda baxımından nəticələr ümidverici deyil. Qonşu Gürcüstanda, məsələn, əhalinin bizim əhalidən 2,5 dəfə az olmasına baxmayaraq, milli komandaya düşmək üçün mübarizə aparan futbolçuların sayı Azərbaycandakından dəfələrlə çoxdur. Bu fərqin səbəbi nədir? Azərbaycan çempionatında son on il ərzində çempionluq uğrunda rəqabət demək olar ki, yoxdur. Sual yaranır: bu ölkədə futbolun problemləri haqqında bu qədər danışan var, hər kəs nəyin düz olmadığını deyir, hətta nə etmək lazım olduğunu da anlayır, amma yaxşılığa doğru heç nə dəyişmir? Əslində, cavab sadədir: çünki problem yalnız futboldan ibarət deyil. Azərbaycanda hər bir sahədə olduğu kimi, futbolda da əsas problem idarəetmə və ümumi siyasi mühitlə bağlıdır. Sual vermək lazımdır: niyə bu ölkədə heç bir klub inkişaf etmir? Niyə Lənkəranın "Xəzər" klubu yox oldu? Məsələ təkcə futbol üçün yaradılan şəraitdə deyil, ümumiyyətlə, ölkədəki biznes mühitindədir. Çünki burada böyük biznesin, xüsusən də özəl biznesin uzunmüddətli mövcudluğu, inkişafı demək olar ki, mümkün deyil. Bəzi insanlar futbola qeyri-ciddi yanaşsalar da, onun cəmiyyət üçün oynadığı rol danılmazdır. Futbol təkcə idman növü deyil, həm də cəmiyyətin birləşməsi, sosial dinamikanın formalaşması üçün vacib bir amildir. Lakin bu amili anlamaq və inkişaf etdirmək üçün ilk növbədə fundamental problemləri həll etmək lazımdır.