Post #1236

⚡️Мұрат Нұртілеу. Смайылов үкіметіндегі Тоқаевтың көзі мен құлағы Кешегі күнге дейін Президент әкімшілігін басқарған Мұрат Нұртілеу өзіне үйреншікті, сыралғы салаға қайтып оралды. Ол енді еліміздің сыртқы саясатына жетешілік етеді және вице-премьерлікті қатар алып жүрмек. Тоқаевтың шинелінен шыққан Нұртілеудің қазіргі қызметін қомсынып, мұны құлдырауға балап отырғандар бар. Dalainside Нұртілеудің калибріндегі саясаткерге мұндай үкім шығаруға асықпайды. Тоқаев өзінің сенімді кадрын кезекті рет от пен суға салғалы отыр. Президенттің шешуші сәтте Нұртілеуге арқасүйеуі алғаш рет емес. Аласапыран шақта солқылдақтық танытқан ҰҚК-ны "мұрттының мұрасынан" тазарту әуелде біздің кейіпкерімізге жүктелген еді. Қауіпсіздік комитетінде саяси талдау және барлау жұмысымен айналысқан "Тоқаевтың адамы" Қаңтардың аптығы басылғаннан кейін АП-ға ауысқан-тын. Ендігі жерде Нұртілеу Жаңа Қазақстаның сыртқы саясаттағы бағыт-бағдарына координация жасайды. 1998 жылдан осы бері осы саланың қазанында қайнап келе жатқан шебер дипломат Тоқаевтың сеніміне селкеу түсірмейді деген ойдамыз. Геосаяси ахуал ширығып тұрған сәтте сыртқы саясатта есе жібермеу маңызды. Ақорда көрші елдің шабына жармасқан Ресейден бәрін күтуге боларына көзі жеткен. Демек, көпвекторлы саясатты ұлттық мүддемен қабыстырып, оны Жаңа Қазақстанның өмір салтына айналдыру одан сайын актуалды бола түспек. Осы тұрғыдан алып-қарағанда СІМ-дегі ауыс-түйістің логикалық шешімі бар. Dalainside дереккөзінің айтуынша Тоқаев Нұртілеуді "дағдарыс менеджері" деп санайды. Оған дейінгі Тілеуберді де осал емес, алайда салаға шешім қабылдай алатын басшы ауадай қажет. Ресейлік пропаганда Нұртілеуді "сұр кардинал" деп есептейді. Назарбаевтың тұсындағы Әбіқаевтың статусы қандай болса да, Тоқаевтың дәуіріндегі Нұртілеудің келбеті де соған ұқсас. Оның Үкіметтегі миссиясы да айқындалып қойған, ол министрлер кабинетіндегі Тоқаевтың көзі мен құлағы болады. Вице-премьерге Мемлекет басшының тарапынан түсетін аса күрделі әрі жауапты жұмыстар жүктелмек. Тоқаев Нұртілеудің тазалығын бағалайды. Ол ескі Қазақстанның әдетінен ада: өткен отыз жылда қазақстандық шенді-шекпенділердің өне-бойына таралып кеткен түрлі ауру-сырқауға қарсы иммунитеті бар. Жеке басқа қатысты дау-шарға да ілікпеген. Ендігі жерде Тоқаев өзінің сенімді кадрын сыртқы саясатта сынап көрмек. https://t.me/dalainside