Post #1243

💸Енді халық кімнің қанша субсидия алғанын ашық көре алады Қордаланып, проблемаға айналған мәселелерді шешу үшін мінез бен саяси ерік-жігер керек. Кезінде майшелпектен ауыз тиген әлдекімдерге ұнамаса да, Ауыл шаруашылығы министрлігі қатаң реформа бастады. Ол жақын жылдары нақты жемісін береді деп сенеміз. Пайдаланылмай жатқан жерлерді қайтарумен қатар, субсидия мәселесіндегі көлеңкелі бизнеске тұсау салынып, мемлекет қолдауын алу, пайдалану мен оны ашық көрсету бағыттарында тәртіп орнайды. Ауыл шаруашылығы министрлігі субсидиялауды автоматтандыруда. Қазір Gosagro.kz жүйесі толыққанды жұмыс істей бастады. Оның қандай өзгерістерге әкелетінін Ауыл шаруашылығы министрі Ербол Қарашөкеев өз фейсбугында түсіндіріп жазды. Біріншіден, егіс алқабының көлемін баяғыдай көзбен өлшеп, бағалай салуға болмайды. Себебі, мысалы, мың гектар деп, соған субсидия алып отырған фермердің шын мәнінде тек 500 гектарды игеріп отырған фактілері көп кездескен. Енді жер аумағы бойынша деректі ғарыштық мониторинг тексеретін болады. "Шаруалар жерлерін дереу ретке келтірулері керек. Жерді игермегендерге осы бастан кірісуіне кеңес беремін", - деп жазады, министр. Екінші мәселе - электронды шот-фактуралар. Енді электрондық шот-фактурамен өтініш беру үшін оны сатушымен бұғаттау керек. Министрдің түсіндіруінше, осылайша, субсидия алғаннан кейін кері қайтарып алу қаупі толығымен алынып тасталады. Егер бұрын шаруа бір ғана шот-фактурамен мемлекеттік қолдауға бірнеше рет өтініш бере алған болса, енді Gosagro жүйесінде ондай қулық жүрмейді. "Бұл салада біржола тәртіп орнату қажет! Егер фермердің жерге қатысты мәселелері толық реттелген болса, барлық құжаттары сәйкес келіп тұрса, біріктірілген мәліметтер базасы расталса өтініш беру жағынан ешқандай қиындық болмайды. Бүгінгі күні жаңа жүйе 12 мыңнан астам өтінімді сәтті өңдеп, оларды облыстардың ауыл шаруашылығы басқармасына қарау үшін өтінімдердің ашық тізіліміне енгізді", - деп жазады, министр Қарашөкеев. Ал халық, журналистер, белсенділер мен сарапшылар мемлекеттік қаржыны кімдер алғанын, қанша алғанын Gosagro.kz порталы арқылы бақылап отыра алады. https://t.me/dalainside