Post #2478

Ҡәҙерле яҡташтар! Хөрмәтле ветерандар, хәрбиҙәр һәм хәрби бурысҡа тоғро булған барлыҡ иптәштәр! Рәсәй Федерацияһы Коммунистар партияһының Башҡортостан республика комитеты һәм шәхсән үҙемдең исемдән һеҙҙе Совет Армияһы һәм Хәрби-Диңгеҙ флоты көнө менән ихлас ҡотлайым! Беҙҙең өсөн был байрам бер ваҡытта ла үҙенең ысын әһәмиәтен юғалтманы. 23 февраль – ул календарь дата ғына түгел. Ул халҡыбыҙҙың ҡаһарманлығы, намыҫы һәм көслө ихтыяры символы. Был – һалдат шинелдәрендә Тыуған илебеҙҙең бойондороҡһоҙлоғон яҡлаған, еребеҙҙең һәр бер киҫәге өсөн көрәшкән һәм беҙгә тыныс тормош бүләк иткән батырҙарҙы иҫкә алыу көнө. Хеҙмәтсәндәр ойошторған һәм уларҙың мәнфәғәттәрен яҡлаған Ҡыҙыл Армия фашизмды ҡыйратты һәм Европаны азат итте. Тап уның һалдаттары һәм офицерҙары тәүгеләрҙән булып йыһанға сыҡты, ҡалалар төҙөнө һәм Ер йөҙөндәге иң ҙур илдең сиген һаҡланы. Бөгөн беҙ, бөйөк Еңеүҙең вариҫтары, иҫтә тоторға тейешбеҙ: армия көсө – уның халыҡ менән бәйләнешендә, ул яҡлаған идеалдар ғәҙеллегендә. Башҡортостанда һәр саҡ хәрби традицияларҙы хөрмәт иттеләр. Яҡташтарыбыҙ Бөйөк Ватан һуғышының бөтә фронттарында ла дошман менән алышты, локаль конфликттарҙа ҡаһарманлыҡ күрһәтте, ә бөгөн махсус хәрби операция барышында Ил алдында биргән антына тоғролоҡ күрһәтә. Лайыҡлы яҡлаусылар тәрбиәләгән ветерандар, тыл хеҙмәтсәндәре һәм әсәләр алдында баш эйәбеҙ. Айырым рәхмәт һүҙҙәре – алғы сафта булған яугирҙарыбыҙға. Һеҙҙе еңеү менән көтәбеҙ. Уны, гуманитар ярҙам ойоштороп, йылы һүҙҙәребеҙ менән һеҙҙе дәртләндереп, ғаиләләрегеҙ хаҡында хәстәрлек күреп, беҙ ҙә яҡынайтырға тырышабыҙ. Башҡортостан коммунистары һәр ваҡыт ябай кешеләрҙең мәнфәғәте һағында торҙо һәм торасаҡ. Ә Ватанды ышаныслы һаҡлау һәр кешене – уның хоҡуҡтарын, дәрәжәһен, киләсәген яҡлауҙан башлана. Берҙәм булғанда, тамырҙарыбыҙға тоғро булғанда ғына – беҙ еңелмәбеҙ. Был байрам көнөндә һәммәһенә лә ныҡлы һаулыҡ, өйҙә тыныслыҡ һәм иртәгәһе көнгә ышаныс теләйем. Ғаиләләрегеҙҙә һәр саҡ мөхәббәт һәм татыулыҡ йәшәһен, ә күгегеҙ саф булып ҡалһын. Байрам менән, ҡәҙерле иптәштәр! Совет Армияһы һәм Хәрби-Диңгеҙ Флоты көнө менән! РФКП-ның Башҡортостан республика комитетының беренсе секретары, БР Дәүләт Йыйылышы – Ҡоролтай депутаты Юнир Ҡотлоғужин