Post #15701

Бүгін Ұлттық индустриялық палатаның шақыруымен «Ақ жол» демократиялық партиясының кәсіпкерлері мен депутаттарынан құралған топ Алматы қаласындағы «Astana Motors Manufacturing» ЖШС мультибрендті зауытының жұмысымен танысты. Сапарға Мәжіліс депутаттары Ерлан Барлыбаев, Қазыбек Иса, Олжас Нұралдинов, сондай-ақ Қазақстанның түрлі өңірлерінен келген 60-тан астам шағын және орта бизнестегі өндіріс өкілдері қатысты. Astana Motors Manufacturing зауыты GWM, Chery және Changan автокөліктерін қосқанда жалпы саны 20-дан астам модель құрастырады. Сонымен қатар, зауыт құрастырылатын көліктерге арналған мультимедиа жиынтықтары мен жоғары технологиялы орындықтардың бірлескен өндірісін құрған. Басшылық отандық мердігерлермен бірге жергілікті қамту үлесін арттыру бағытында осы саланы дамытуды көздеп отыр. Осы тұрғыда, зауытпен танысудан бөлек, компания басшылығы «Ақ жол» демпартиясының кәсіпкерлерімен кездесу өткізді. Кездесу барысында өндірісті локализациялау және халықаралық серіктестердің біліктілік талаптарынан өткен жағдайда, жергілікті өндірушілерге компоненттерді өндіруге арналған оффтейк-келісімшарттарды беру жоспарлары талқыланды. Өз кезегінде делегация мүшелері тораптар мен бөлшектерді өндіру және жеткізу бойынша ұсыныстарын білдірді. Атап айтқанда, тежегіш жүйелерін, ауа және өзге де сүзгілерді, бояу өнімдерін, кабельдерді, әйнек көтеру жүйелерін, пластмасса және резеңке-техникалық бұйымдарды өндіруді жолға қоюға дайын екендіктерін жеткізді. Серіктестіктің ықтимал бағыттарын талқылау барысында Astana Motors Manufacturing Kazakhstan басшылығы құрамдас бөлшектер өндірушілерді іріктеу және сертификаттау процесін, келісімшарттар жасау шарттарын егжей-тегжейлі түсіндіріп, шығарылатын автокөліктерді құрастыруда қолданылатын (3000-нан астам атау) тораптар мен бөлшектердің тізімін ұсынды. Локализациялаудың басты талабы – халықаралық стандарттарға сәйкестік, бренд иелерінен сертификаттаудан сәтті өту, технологиялық процестер мен персоналды аккредитациялау болып табылады. Өз тарапынан, жергілікті қамту үлесін арттыруға мүдделі Astana Motors компаниясы әлеуетті серіктестерге негізгі құрамдас бөлшек өндірушілермен байланыс орнатуға қолдау көрсетуге дайын екенін білдірді. Бұл сапар келіссөздерге қатысқан барлық тарап үшін пайдалы болды деп сенеміз. Жалпы алғанда, мұндай кездесулер заманауи технологияларды ілгерілетуге және өндірістік ынтымақтастықты дамытуға оң әсерін тигізеді.