Post #172

President’s Cup: Азиза Қаражанова Қазақстан қоржынын тағы бір қола жүлдемен толықтырды Бұл күндері Қытайдың Тайань қаласында таеквондодан President’s Cup - Asian Region халықаралық жарысы өтіп жатыр. Алғашқы жарыс күнін қазақстандық таеквондошылар қос қола жүлдемен аяқтады. Ел қоржынына екінші қоланы 53 келіге дейінгі салмақта ел намысын қорғаған Азиза Қаражанова салды. Азиза жарыс барысында барлығы төрт кездесу өткізіп, оның үшеуін жеңіспен аяқтады. Ол алғашқы айналымда-ақ Париж Олимпиадасының күміс жүлдегері Цин Гоны (Қытай) жарыс жолынан шығарды. Екінші кездесуде тайпейлік По Я Судан басып түсіп, ширек финалда әлем чемпионатының күміс жүлдегері Цзо Цзюйді (Қытай) ығыстырды. Финалдық жолдаманы сарапқа саларда Париж Олимпиадасының қола жүлдегері, әлем чемпионы Мобина Нематзадеге (Иран) есе жіберіп, қола жүлдені қанағат тұтты. Осылайша, President’s Cup - Asian Region жарысын үшінші орынмен аяқтаған Азиза Қазақстанға 2026 жылы өтетін Азия чемпионатына қосымша жолдаманы сыйға тартты.