Post #328

Қазақстандық таеквондошы Нодира Ахмедова Гран-при кезеңінің күміс жүлдегері атанды АҚШ-тың Шарлотт қаласында өткен “World Taekwondo Grand Prix Challenge” халықаралық турнирінде Қазақстан қоржыны күміс жүлдемен толықты. Таеквондодан (WT) Қазақстан құрамасының өкілі Нодира Ахмедова 49 келіге дейінгі салмақ дәрежесінде үздік үштіктен көрінді. Ақтық кездесуінде Нодира Тайвань спортшысы Лю Юй Юнмен сынға түсті. Бірінші раунд 1:8 есебімен қарсыласының пайдасына аяқталса, екінші раундта Ахмедова дәл соққымен алға шықты. Алайда, қарсыласы кездесудің соңына қарай басымдықты қайта иеленіп, 5:3 есебімен жеңіске жетті. Осылайша, Нодира Ахмедова 2025 жылғы Гран-при сериясының алғашқы кезеңінің күміс жүлдегері атанды. Бұған дейін Қазақстан құрамасына қос қоланы Тамерлан Тілеулес (-58 кг) пен Батырхан Төлеуғали (-80 кг) сыйлаған болатын. АҚШ-та өткен World Taekwondo Grand Prix Challenge - Бүкіләлемдік таеквондо федерациясының (WT) қолдауымен ұйымдастырылған халықаралық серияның алғашқы кезеңі. Турнирге 44 елден 376 спортшы қатысып, өзара мықтыны анықтады. Турнир қорытындысы бойынша, жүлдегер атанған отандастарымыз 2026 жылы Италияның Рим қаласында өтетін Гран-при жарысына жолдама жеңіп алды.