Post #485

Астанада Kazakhstan Open 2025 халықаралық турниріне арналған баспасөз конференциясы өтті Бүгін, 13 тамыз күні, Астанада таеквондодан Kazakhstan Open 2025 халықаралық рейтингілік турниріне арналған баспасөз конференциясы өтті. Іс-шараға World Taekwondo ұйымының президенті доктор Чунгвон Чо, Дүниежүзілік таеквондо федерациясының техникалық директоры Мохамед Шаабан, Қазақстан таеквондо (WT) федерациясының президенті Кудрәт Шамиев, ұлттық құраманың бас бапкері Есбол Сұлтанов және Спорт және дене шынықтыру істері комитеті төрағасының орынбасары Нұрлан Есембаев қатысты. Естеріңізге сала кетсек, 12 тамыз күні делегация Президент резиденциясына барып, Мемлекет басшысының қабылдауында болды. Кездесу барысында Қазақстанда таеквондоны дамыту, халықаралық ынтымақтастықты кеңейту және әлемдік деңгейдегі жарыстарды өткізу мәселелері талқыланды. «G-1 санатындағы турнирдің сегіз жылдан кейін Қазақстанға қайта оралуы – еліміздің әлемдік спорт қауымдастығының сеніміне ие болғанының дәлелі. Биыл біз 22 елден 750-ден астам спортшыны қабылдаймыз, олардың арасында қазіргі Олимпиада чемпиондары мен әлемдік рейтингтің үздіктері бар. Біздің мақсатымыз тек жарыс өткізу емес, жоғары ұйымдастырушылық деңгейімізді, спорт инфрақұрылымының мүмкіндіктерін және қонақжайлылығымызды көрсету. Бұл 2026 жылғы Гран-при финалының алдында жақсы дайындық болмақ және 2027 жылғы Әлем чемпионатын өткізуге арналған өтінішімізді қолдайтын маңызды дәлел болады. Биыл жарысымызда жаңа ережелер, KPNP K-2 технологиялары қолданылып жатыр. Еліміз соққыларды дәл әрі әділ тіркеуге арналған арнайы электронды қолғаптарды сатып алып, дәл осы турнирде қолданысқа енгізді. Мұндай технологияларды енгізу — таеквондоның жаһандық дамуына сай болуға және халықаралық стандарттарға сәйкес жұмыс істеуге деген ұмтылысымыздың көрінісі. Kazakhstan Open 2025 жас буынды шабыттандырып, еліміздің өңірлерінде бұл спорт түрінің дамуына серпін беретініне кәміл сенемін», - деді Қазақстандық таеквондо (WT) федерациясының президенті Кудрәт Шамиев. Kazakhstan Open 2025 турнирі 14–16 тамыз күндері Астанадағы Жақсылық Үшкемпіров атындағы Жекпе-жек сарайында өтеді. «Kazakhstan Open 2025 – бұл еліміздің халықаралық спорт қауымдастығындағы сенімді әрі ашық әріптес ретіндегі мәртебесін айқындайтын маңызды оқиға. Мұндай турнирлерді өткізу жай ғана спорттық күнтізбедегі шара емес, Қазақстанның әлемдік аренадағы позициясын күшейтуге бағытталған кешенді жұмыстың бір бөлігі. Соңғы жылдары қазақстандық спортшылардың ірі халықаралық жарыстарда көрсетіп жүрген нәтижелері тұрақты өсімге ие. Бұл Министрліктің салалық федерациялармен жүйелі жұмысы мен Мемлекет басшысының халықаралық ынтымақтастықты нығайту жөніндегі тапсырмаларын іске асырудың нақты нәтижесі. Соңғы бірнеше айда Қазақстанға халықаралық спорт ұйымдарының ондаған жетекшісі келді, біз бұл бағыттағы жұмысты жалғастырып, шетелдік әріптестерімізбен тәжірибе алмасуды және берік серіктестік орнатуды көздейміз. Осы турнирде де спортшыларымыз ел намысын абыроймен қорғап, жанкүйерлерді жаңа жеңістерімен қуантады деп сенеміз», – деді Спорт және дене шынықтыру істері комитеті төрағасының орынбасары Нұрлан Есембаев. Жарыс жасөспірімдер, жастар және ересектер арасында ұйымдастырылады. Жарысқа кіру тегін. Турнирдің тікелей эфирі Qazsport телеарнасында көрсетіледі.