Post #671

21 жасқа дейінгі Қазақстан ересектер құрамасының аға жаттықтырушылары тағайындалды 21 жасқа дейінгі ересектер арасындағы таеквондодан (WT) Әлем чемпионаты қарсаңында Қазақстандық таеквондо (WT) федерациясы осы жас санатындағы ұлттық құрама командасының аға жаттықтырушыларын тағайындау туралы шешім қабылдады. Команданың жоғары деңгейде дайындалуын қамтамасыз ету, жаттығу процесінің тиімді жүйесін құру және қазақстандық таеквондошылардың халықаралық аренадағы бәсекеге қабілеттілігін арттыру мақсатында Қазақстан құрамасының (U-21) аға жаттықтырушылары болып еліміздің тәжірибелі мамандары Давранбек Ризаев пен Дархан Қыстаубаев тағайындалды. Давранбек Ризаев пен Дархан Қыстаубаев қазақстандық таеквондо қауымдастығына жақсы таныс. Олардың жетекшілігімен Қазақстан және Азия чемпиондары мен жүлдегерлері, Дүниежүзілік Универсиаданың жеңімпаздары, сондай-ақ Гран-при кезеңдерінің жүлдегерлері тәрбиеленді. Ұлттық құраманы жасақтау мақсатында тамыз айында Қарағанды қаласында 21 жасқа дейінгі ересектер арасында Қазақстан Республикасының ресми чемпионаты өтіп, ол алдағы Әлем чемпионатына іріктеу кезеңі болды. Айта кетерлігі, 21 жасқа дейінгі ересектер арасындағы таеквондодан (WT) 2025 жылғы Әлем чемпионаты 3–6 желтоқсан аралығында Найробиде (Кения) өтеді.