Post #1133

27 مارچ کو، عید الفطر کی آمد سے قبل، اسلام آباد میں پاکستان کے مستحق افراد کے لیے روسی انسانی امداد کی فراہمی کے سلسلے میں ایک تقریب منعقد ہوئی۔ 30 ٹن سے زائد امدادی سامان میں خوراک، ادویات، کپڑے اور دیگر ضروری اشیاء شامل تھیں۔ یہ امداد روس کی وزارت برائے ہنگامی حالات کی خصوصی پرواز کے ذریعے، پاکستان میں روسی سفارت خانے کے بھرپور تعاون سے، پاکستان پہنچائی گئی اور پاکستان ہلالِ احمر کے سپرد کی گئی۔ تقریب میں پاکستان میں روس کے سفیر البرٹ خوریف، ترجمان دفتر خارجہ شفقت علی خان، وزارتِ خارجہ اور نیشنل ڈیزاسٹر مینجمنٹ اتھارٹی (این ڈی ایم اے) کے نمائندوں نے شرکت کی۔ اپنے خطاب میں روس کے سفیر البرٹ خوریف نے کہا کہ روس اور پاکستان کے درمیان انسانی ہمدردی پر مبنی تعاون نہ صرف دوطرفہ تعلقات کو مضبوط بنانے میں اہم سنگِ میل ہے، بلکہ باہمی اعتماد اور یکجہتی کی روشن مثال بھی ہے۔ اُنہوں نے اس امر پر زور دیا کہ روس اور پاکستان کے تعلقات اس وقت اپنی تاریخ کی بلند ترین سطح پر ہیں، اور روس ہمیشہ مشکل کی گھڑی میں پاکستان کے برادر عوام کی ہر ممکن مدد کے لیے پیش پیش رہے گا۔