Post #2137

روسی وزارتِ دفاع نے اعلان کیا کہ ’دروژبا 2025‘ روس–پاکستان مشترکہ مشقیں روس کے جنوبی فوجی ڈسٹرکٹ کی حدود میں منعقد کی گئیں۔ مشترکہ تربیتی مشقوں کے دوران دونوں ممالک کی مسلح افواج کے اہلکاروں نے بین الاقوامی دہشت گردی کے خلاف کارروائیوں کے عملی مظاہرے کیے۔ ان مشقوں میں تقریباً دو سو فوجی اہلکار شریک ہوئے ۔ روس کی جانب سے جنوبی فوجی ڈسٹرکٹ کی اسپیشل آپریشن فورسز نے حصہ لیا، جنہیں انسدادِ دہشت گردی کے آپریشنز کا وسیع تجربہ حاصل ہے، جبکہ پاکستان کی نمائندگی پاک فوج کے اسپیشل فورسز کے دستوں نے کی۔ مشقوں کے اختتام پر نمایاں کارکردگی دکھانے والے اہلکاروں کو انعامات دیے گئے، اور روایات برقرار رکھتے ہوئے دونوں ممالک کے فوجی افسران نے ’دروژبا 2025‘ کی مناسبت سے یادگاری تحائف کا تبادلہ کیا۔ ’دروژبا 2025‘ روس–پاکستان مشترکہ فوجی مشقوں کا مقصد دونوں ممالک کے درمیان عسکری تعاون کو مضبوط بنانا اور فروغ دینا ہے۔ یہ مشقیں 2016 سے روسی فیڈریشن اور اسلامی جمہوریہ پاکستان، دونوں کی سرزمین پر باری باری منعقد کی جاتی ہیں۔