Post #824

Кускова ҳимоя қилди. Қувончлиси, ҳамюртимиз мазкур дастурда энг яхши натижани қайд этиб, олтин медалга эга чиқди. Бундан ташқари, БААнинг Фужайра шаҳрида таэквондо WТ бўйича G2 таснифидаги мусобақа ўтказилди. Катталар ўртасидаги беллашувлар якунига кўра, Ўзбекистон терма жамоаси 2 та олтин, 1 та кумуш ва 6 та бронза медалларига сазовор бўлди. Мазкур ойда Қозоғистоннинг Алма-Ата шаҳрида бўлиб ўтган сабля бўйича ёшлар JK босқичи жамоавий мусобақасида Ўзбекистон терма жамоаси энг кучли рақиб жамоалар устидан ғалаба қозонди ва шоҳсупанинг юқори поғонасини эгаллаб, олтин медалга сазовор бўлди. Шунингдек, бокс, оғир атлетика, байдарка ва каноэда эшкак эшиш спорт турлари бўйича ҳам спортчиларимизнинг эришган ютуқлари туфайли Европа, Осиё, Америка қитъаларининг бир қатор давлатлари спорт мажмуаларида Ўзбекистон байроғи кўтарилиб, мадҳиямиз баралла янгради. Жорий йилдан бошлаб, Президентимиз томонидан юртимизда ҳаваскор ҳамда профессионал спортчилар орасида яна бир спорт мусобақаларини ўтказиш ташаббуси илгари сурилди. Шу боис, август ойида пойтахтимизда спортнинг 10 та тури бўйича “Янги Ўзбекистон Олимпия чўққилари” спорт мусобақалари бўлиб ўтди. Шу ўринда соғлом ва баркамол авлодни тарбиялаш, Ўзбекистонни чинакам спорт мамлакатига айлантириш мақсадида Тошкентда қурилган улкан Олимпия шаҳарчасини эса юртимиз спортининг бугуни ва эртасига қўйилган мустаҳкам пойдевор деб аташ мумкин. Шаҳарчада Спорт вазирлиги, Антидопинг агентлиги, Давлат спорт академияси, Жисмоний тарбия илмий-тадқиқотлар институти, Спорт турларини ривожлантириш маркази ҳам жойлаштирилган. У ерда халқаро даражадаги мусобақалар ўтказилади. Иншоотлар ундан кейин ҳам бўшаб қолмайди. Мамлакатимиз терма жамоаларининг ўқув-машғулотлари ташкил этилади. Федерациялар спорт мактаблари билан боғланади. Яна бир муҳим жиҳати ҳудудда ва мажмуаларда юртдошларимиз ҳам спорт билан шуғулланиши мумкин бўлади. Президент Шавкат Мирзиёев жорий йил 18 август куни Олимпия шаҳарчасига ташриф буюриб, спортчилар учун у ерда яратилган шароитлар билан танишди. Бугун мамнуният билан эътироф этишимиз лозим бўлган бир сўз бор: қилинган меҳнатлар бесамар кетмаяпти. Бугун ҳатто халқимизнинг узоқ йиллик орзулари рўёбга чиқиб, юртимиз футболида ҳам шукуҳли ғалабаларга эришилмоқда. Сентябрь ойида “CAFA Nations Cup” финалида Ўзбекистон ҳамда Эрон миллий терма жамоалари тўқнаш келди. Мураккаб кечган ўйинда ҳамюртларимиз 1:0 ҳисобида ғалаба қозонди. Давлатимиз раҳбарининг мазкур ўйинни стадионга ташриф буюриб томоша қилиши халқимизнинг спортга, ҳоссатан, футболга бўлган иштиёқи ва ҳиссиётларига ҳамроҳ эканидан яна бир бор далолатдир. Президентимиз “Янги Ўзбекистон” боғида мамлакатимиз давлат мустақиллигининг 34 йиллигига бағишланган байрам тадбирида алоҳида таъкидлаганидек, футбол бўйича миллий терма жамоамиз мамлакатимиз тарихида илк бор жаҳон чемпионати йўлланмасини қўлга киритиб, 34 йиллик орзу-умидимизни рўёбга чиқарди. Талаба-ёшларимиз эса Халқаро ёзги универсиада ўйинларида 116 та давлат орасида илк бор биринчи ўн бешталикка кирди ва Марказий Осиёда биринчи ўринни эгаллади. Ушбу байрам арафасида 19 ва 22 ёшли боксчиларимиз Осиё чемпиони, деган юксак унвонга сазовор бўлиб, ўзбек бокс мактабининг шуҳратини дунёга яна бир бор намоён этди. Дарҳақиқат, спортдаги кенг имкониятлар ва шунга муносиб шонли ғалабаларга бой мисолларни кўплаб келтиришимиз мумкин. Боиси қайси спорт тури бўлмасин, юртимизда айни йўналишда юқори чўққиларга эришаётган ёшларни учратиш мумкин. Буларнинг барчасини юртимизда спорт соҳасини ривожлантириш ва унга аҳолини, жумладан, ёшларни кенг жалб этишга қаратилаётган ислоҳотлари натижаси деб айтиш мумкин. Абдулазиз РУСТАМОВ