Post #1197

Роғун ГЭСи Тожикистоннинг жанубида, Вахш дарёси бўйида қурилмоқда. У Душанбе шаҳридан тахминан 110 км узоқликда жойлашган бўлиб, Вахш дарёси каскадидаги гидроэлектр станциялардан бири ҳисобланади. Лойиҳа тўлиқ амалга оширилгандан сўнг, баландлиги 335 метр бўлган Роғун тўғони дунёдаги энг баланд тўғонга айланади. Станциянинг қуввати 3600 МВтни ташкил этиб, у Марказий Осиёдаги энг йирик гидроэлектр станция бўлади. 2018 йил 16 ноябрда қуввати 120 МВт бўлган биринчи агрегат ишга туширилган. Иккинчи агрегат эса 2019 йил 9 сентябрда, Тожикистон Мустақиллик куни арафасида фойдаланишга топширилган. Халқаро экологик коалиция – Rivers without Boundaries («Чегарасиз дарёлар») ўз ҳисоботида Роғун сув омбори ишга туширилса, Амударёнинг қуйи қисмидаги ноёб табиий экотизимлар яна 60–100 йил давомида зарарланишда давом этишини таъкидлайди. Шунингдек, экологлар Роғун ГЭСи лойиҳаси ишлаб чиқувчилари томонидан муҳим ташқи омиллар етарлича ҳисобга олинмаганини қайд этмоқда. Жумладан, Афғонистонда қурилаётган Қўштепа канали минтақанинг сув балансига сезиларли таъсир кўрсатиши мумкин. P.S. Шу боис, минтақада барқарорликни таъминлаш учун сув дипломатиясини изчил йўлга қўйиш, қўшни давлатлар билан очиқ мулоқот олиб бориш ва ўзаро манфаатли келишувларга эришиш ниҳоятда муҳим. Бу эса сув ресурсларидан оқилона ва адолатли фойдаланишга, шу билан бирга экологик мувозанатни сақлашга хизмат қилади. ✅Kanalga ulanish: 👉🏻@uz_sfa