Фахриёр

Негадир Дунё чаппароста айланар шошиб – негадир борлайди кимдир туйқусдан. Изтироблар қайта кўтарар бошин, армонлар уйғонар қиш уйқусидан. Негадир оғочлар гуллай бошлайди, негадир яшиллик босар оламни. Баҳор осмонидай кўзни ёшлайди, йўқлов сусти босар бирдан одамни. Биласан, орқага энди йўл йўқдир, у кунлар ҳеч қачон келмайди қайтиб: Умр олға қараб учётган ўқдир – қайтар на қайғуси ва на ҳайити. Бахт ўтар, бахтсизлик ўтар – йўқ ҳисоб, гарчи юрак ҳисга юм таланади. Кулдан минг тўраган қақнус қуш мисол негадир муҳаббат қайталанади. 2015 йил 3 май

Sen ketarsan. Qolmoq xatosi kuymoq xunlariday bo‘ynimda. Ko‘ngil yovlar bosgan vatanning bayrog‘iday nimta va nimta... Men yengilgan lashkarday o‘ngni topshiraman tushlar hukmiga. Yengib bo‘lmas sensiz bu mungni yengib bo‘larmikin va nega? Mung ham qismat va g‘am singari yengilmaydi, chekilar. Tutun. Mungrarim sen, sendir singrarim, bog‘larimdan ketayotgan gul, o‘zga dilning barini tutib. Boshlarimga yog‘a boshlar kul… Faxriyor

Шоирлар — ҳали англаб етилмаган илҳомнинг илоҳий маъноларини талқин қилувчилар; келажак ҳозирги замон устига ташлаётган улкан сояларнинг кўзгуси; ўзи тушунмайдиган нарсани ифода этувчи сўзлар; жангга чорловчи, аммо ўзи нимага илҳом бераётганини ҳис этмайдиган карнайлар; ўзи қўзғалмайдиган, аммо бошқаларни ҳаракатга келтирадиган куч. Шоирлар — дунёнинг тан олинмаган қонун чиқарувчилари. Перси Биши Шелли (1792-1822), инглиз романтик шоири

Шиор - Фахриёр сатри.

юлдуз Туркманистонлик курсдошим Зуҳра Каримовага юлдуз ҳордиқ чиқармас асло, дейлик, ойдан сўрамас таътил. тошовузми, тошкентми, осло узра чарақлайди муттасил. маош олмас порлаганига, йўлчилиги учун пул олмас, сендан – ҳар кун борлаганидан – гина қилмас, юзингга солмас. исми зуҳро, чўлпон эканин билмайди у – самонинг жисми. у – тунларнинг олис бекаси, ва қизларнинг бахтиёр исми. санамларга берар истара, ва тақдирни белгиламоққа тангрига қарашар, (тарарам!) орзуларинг кўчирар оққа – рўёбини беради тилаб, учмай турар яшашинг учун. шундан осмон тушмайди қулаб, шундан тақдир сийлайди қучиб… 2026 йил 8 март Манба: @faxriyor_ijodi1

capriccio* меҳмондорчиликда бегонасираб, уйга кетамиз, деб йиғлаган бола сингари овутиб бўлмайди сира юракни. йиғлайди, дод ҳам солади, тепинар, олдига жанаштирмайди на мезбон, на бирор меҳмон зотини. борар жойин айтмас, гапга кирмайди, ҳеч ким сўрай олмас уйин ботиниб... *каприччио (ит.) – 1. инжиқлик; 2. мусиқада кутилмаган ва тез-тез ўзгариб турадиган оҳангга эга бўлган чолғу асари. 2026 йил 20 март

илож ўйин давом этар тўхтовсиз, ҳеч кимсага қилинмас карам. довни тиксанг ва ёхуд довсиз ўйнасанг ҳам, ўйнамасанг ҳам. сени алдаб енгмоқчи бўлиб, минг турланиб кўради ҳаёт: гоҳ дўқ уриб, гоҳида кулиб. енгилмайсан барибир – аён: енг ичида турган бекитиқ ишонганинг кузир қартадай, бир чеккаси туради чиқиб ўлимингнинг – гўзал мартаба! 2026 йил 8 апрел https://t.me/faxriyor_ijodi1

* * * хаста эди, узоқ оғриди ва кун келиб, етди ажали. бутуни йўқ эди бағрининг, йўқ эди овқатга мажоли, томоғидан ўтмасди сув ҳам. тақдирнинг ишлари аломат: фақат кўнгли тўқ эди (Эгам!) ва имони эди саломат. 2026 йил 19 апрел Манба: @faxriyor_ijodi1

томоша сен ўзингга келдинг, фаҳмимча, топгандайин адолат қарор, келгандайин худонинг раҳми, яна насиб этгандай мароқ... фақат тан берк эди тақатақ, ўзлигингга қўймади сени. (қайда юрган эдинг шунча вақт, қай тоғлардан келгандинг эниб?) тақиллатдинг, кўксингни муштлаб ва эмрандинг, ўзликсиз гадо! фарёд қилдинг, ҳуркиди қушлар, ичкаридан чиқмади садо. “лазги”ни ҳам чалиб кўрдилар, жон эмасдинг, киритмади тан. кўпайлашиб изн сўрдилар, “қилт” этмади ўзлигинг, аттанг. ижарага қўймади ҳеч ким, ҳеч ким ўздан ортмас айтарли. кетган эдинг ўзлигинг ечиб, киёлмассан энди қайтариб... 2026 йил 24 апрел @faxriyor_ijodi1

#shoir_qalbi Shukrona Bor quduqlar ko‘milib ketdi, qamish bo‘yra bo‘ldi o‘rilib, sotib yuborildi yo chetga, elning tinchi afzal ko‘rilib. Tolqon emas, shukr solingan har bandaning og‘ziga – qoyil. Baxtliman deb tilxat olingan, baxtsiz bo‘lmoq endi ne joiz? Bilib oldik shukr qilishni, ne hojatdir ko‘ngil torligi? Endi hamma shartmas bilishi Iskandarning shoxi borligin. Faxriyor 📱Telegram📱Instagram 📱Veb-sayt📱Facebook

ишқ ғолиблик ҳам, мағлублик ҳам йўқ, фақат йўл бор, чағат ё чангал- зорларни оралаб ўтар, ўқ узган ҳам ўзингсан – дангали – ўқ еган ҳам ўзингсан (– бари), енгилганинг – енгганинг, мавло. енгиласан енгганинг сари, енгилганинг енггандан авло. манзил ҳам йўқ, йўқдир мурод ҳам, фақат йўл бор – суймоқ амали: ёнган каби зулумотда шам, парвонадек – куймоқ амали… 2025 йил 12 январ Манба: @faxriyor_ijodi1