Post #251

Прописка бўйича лайфхак Тошкент пропискасини олиш дардида тунлари билан ухлолмай чиқаётган юртдошларимиз кўпчиликни ташкил қилиши бор гап. Шу мавзуда саволлар ҳам кўп. Хабарингиз бор, яқинда Тошкентда пропискаси бўлмаган шахслар ҳам исталган нархдаги янги уйлардан бирини сотиб олса, 1-банд бўйича пропискага кириши белгиланди. Аввалгиларга ўхшаб, камида ЭКИҲ 2500 баравари деган чеклов бекор бўлди. Кўпчиликда янги уйлардан сотиб олиш учун имконият бўлмаслиги мумкин. Бугунги кунда «янги уй» ва «арзон» деган тушунчалар ер ва осмон каби бир-бирига қарама-қарши. Ёки айримларда уй олиш учун эҳтиёжнинг ўзи йўқ. Сабаби унинг шундоқ ҳам Тошкентда уйи бор, фақат ўзининг пропискаси бўлмагани учун, бирор танишининг номига расмийлаштиришга мажбур бўлган. Улар ўз уйини (!) ўз номига (!) ўтказиш учун эса прописка олиши керак ва бунинг учун яна фалоооон пул сарфлаб янги уйлардан сотиб олиш «невыгодно» албатта. ❗️Лайфхак Агар шу каби муаммолар қинаётган бўлса, унда Сизларга маслаҳатим, янги уйларни бир киши эмас, бир неча киши пул қўшилишиб, сотиб олсангиз бўлади. Бу нима дегани? Фуқаролик кодексининг 353-моддасига биноан, икки ёки бир неча шахс шартнома имзолаши мумкин. Яъни бирор мулкни албатта 1 киши сотиши ёки 1 киши сотиб олиши шарт эмас. Тарафлар кўпчилик бўлиши мумкин. Шундан келиб чиқиб, янги қурилаётган уйларни 3-4 киши ўртага пул ташлаб (улуш қўшиб) сотиб олиши ҳам мумкин. Бундай ҳолда пропискага оид қонун ҳужжатларига биноан, сотиб олувчи томон неча киши бўлса, уларнинг ҳаммаси 1-банд бўйича пропискага киради. Масалан, мерос ҳуқуқи асосида юзага келадиган вазиятни олайлик. Айтайлик, кимдир Тошкентдаги уйини пропискаси йўқ 3 кишининг номига васият қилади. Унинг вафотидан сўнг, уй учала меросхўр номига расмийлаштирилади (кадастрдан ҳам ўтказилади) ва натижада ўша 3 киши Тошкентдан прописка олади. Янги уйлардан бир неча киши сотиб олишда ҳам худди шунақа бўлади. (айрим маклерлар қари, ёлғиз, касалманд инсонларни топиб, васиятнома ёздириб бериш эвазига бизнес қилиши ҳам ёлғон эмас) ЭСЛАТМАЛАР Фақат бундай қарорга келишдан олдин қуйидагиларга эътибор қаратинг: 1) дуч келган шахслар билан эмас, ўзингиз ҳақиқатдан ишонган инсонлар билан биргаликда уй сотиб олинг, чунки эртага муаммо бўлиши мумкин (аслида шартномада ким қанча улуш қўшгани ёзилса, катта муаммо ҳам бўлмайди); 2) ўша сотиб олинган уйда барчанинг бирдек ҳаққи бўлишини унутманг; 3) пропискага кириб бўлгач, янги уйни 3 йил ичида сотиб бўлмас экан, деган гаплар нотўғри. Бемалол сотиш мумкин. Фақат бу ортиқча катта харажат дегани. Аниқроғи агар янги уй 3 йил ичида қайта сотилса, ЭКИҲнинг 400 баравари, яъни 81 млн 92 минг сўм давлат божи тўланади. Ва ўз-ўзидан бу давлат божи одатда уйни сотаётган шахслар зиммасига тушишини унутманг; 4) олинган маълумотларга кўра, барча девелоперлар ҳам ўзлари қурган янги уйларни бир неча кишига сотишга рози бўлмаётган экан. Улар бундай кўп томонлама олди-сотди шартномаларини нотариус тасдиқлаб бермаслигидан хавотирда. Аммо бу асоссиз қўрқув. Бир неча тарафлардан иборат олди-сотди шартномаларини нотариуслар рад қилишга ҳеч қандай асос йўқ. Ушбу мақолани тайёрлаш чоғида айрим нотариуслар билан гаплашдим, улар ҳам бир неча киши сотиб олаётган уйларнинг шартномасини тасдиқлашда ҳеч қандай муаммо йўқлигини таъкидлашди. 5) Қурувчи билан тузилаётган олди-сотди шартномасида сотиб олувчи сифатида албатта бир неча кишининг исм-шарифи кўрсатилиши кераклигини унутманг. Яъни шартномада фақат 1 кишининг номи тилга олиниб, нотариусга борганда “биз 3 кишимиз” дея даъво қилманг, барибир фойдаси йўқ. Хуллас, шунақа гаплар. Прописка яратаётган тақиқлар шу даражада «ажойиб»ки, уни айланиб ўтиш учун халқ томонидан мана шунақа унданда ажойиб усуллар ўйлаб топилаверади, топилаверади... Фақат бир томони ёмон, бугун прописка илинжида ҳар нарсага тайёр шахслар кўраётган усуллар эртага янги низоларни кўпайтириши, муаммоларни келтириб чиқариши мумкин. Сунъий тўсиқлар ҳеч қачон жамият фойдасига ишламаган. Буни тарих исботлаб қўйганига анча бўлган. Каналга уланиш: 👇 https://t.me/joinchat/AAAAAEe1KDC7Hm03UPVooQ