Post #2161

過去四個月，靠住「不割蓆，不分化，不篤灰」嘅原則，香港人凝聚咗史無前例嘅力量。前路儘管仲係一片黑暗，因為有各界手足嘅不離不棄，我地嘅未來從來未試過好似係呢一刻咁充滿希望。 前線、後勤、文宣，即使來自不同背景，有住不同嘅諗法，但為住五大訴求嘅共同目標，我地學識咗合作。為咗保護後勤嘅手足，前線可以冒住被捕、受傷、甚至死亡嘅風險頂喺前排；為咗前線嘅安全，後勤為前線提供最好嘅裝備同工具；哨兵為落場嘅手足提供即時嘅戰場資訊；有時前線做左啲大眾未必明白嘅決定，文宣組可以為前線手足解釋。 每個人喺呢場抗爭都有自己嘅崗位，只要大家肯行多一步，互補不足，終有一日我地可以除低口罩，喺煲底一齊唱香港國歌。 但係，最近捉鬼嘅風氣卻令我地好擔心，到底大家仲守唔守得住「不割蓆，不分化，不篤灰」嘅原則？捉鬼，捉到當然可以更加保障到手足嘅安全。但好可惜現時99%嘅捉鬼post，根本上就係一班冷氣軍師接受唔到前線抗爭者行得太前嘅產物。喺一啲火魔法、裝修、教訓藍絲嘅片／相下面，不難發現大量「多謝黑警臥底」之流嘅留言，又有人會執著一啲細節：「點解佢咁大隻？」、「點解佢有疑似警棍」、「點解佢身上有記認」，而質疑相／片中人係咪前線手足。更可怕嘅係，呢啲留言經常會得到大量嘅like。 網上捉鬼最反智嘅係，冷氣軍師，一群最唔熟前線環境嘅人，嘗試從一啲簡單嘅圖片、影片中搵出唔係前線嘅手足。每次見到冷氣軍師捉鬼嘅理據，唔識就嚇死、「請廣傳」，識嘅就真係笑死，「膠都廢事比」。 常見理據一，「真抗爭者唔會xxxx」。唔好意思，前線抗爭者唔係綿羊，唔係乖乖仔，而係由戰場嘅歷煉中進化出來嘅戰士。當呢個政權毫無底線地以性暴力、酷刑、謀殺等等嘅手段壓迫香港人，前線抗爭者必然需要無底線地抗爭。無底線唔得於無原則，抗爭者唔會針對記者或者無辜嘅市民就係最好嘅證明。中資／親中企業，係中国經濟殖民香港嘅工具；藍絲廢老，會打人，有機會身懷利器，甚至會用車撞向人群，係所有抗爭者嘅威脅；黨鐵，港共政府嘅幫兇，721開車門令市民被鄉黑虐打、831任由狗隻發癲咬人並拒絕交出CCTV、最近更成為運輸狗隻嘅交通工具，罔顧乘客安危。以上嘅目標受到抗爭者武力升級嘅針對可謂理所當然。This is WAR，唔係一句口號，而係香港今日嘅現實。抗爭者必須擴張戰線，喺任何有效嘅層面削弱對方嘅力量。前線抗爭者甘願以自己嘅前途、生命為賭注再行前一步，希望因為各種原因而不敢上前線嘅冷氣軍師都可以係思想上進化一下，與時並進。 常見理據二，「點解佢有記號／咁大隻」。如果你真係企過去前線，你就會知道前線有好多唔同嘅小隊。當個個都蒙哂面，兵荒馬亂之際，如果冇顯眼嘅記認，手足好容易搵唔番自己嘅隊友。正正因為有臥底嘅存在，如果前線手足落咗單，又認唔返啲隊友，佢就身處喺一個非常危險嘅位置。以有記認為由捉鬼根本就係無稽之談。以屠龍隊為例，有次佢地用粉紅色貼紙做記認，就被啲冷氣軍師當係鬼。用大隻做理由話係黑警更加係笑話，呢個時勢學生做下gym真係基本嘢。如果唔小心比啲Popo撳低左，唔練大隻啲又點走得甩呢？無錯，有時你係會捉到黑警，但更多嘅情況係捉錯咗前線嘅手足。試想手足打完仗筋疲力盡返到屋企，仲要比班除左9up之外毫無貢獻嘅冷氣軍師話係鬼會點諗？ 前線手足係稀有物種，希望大家好好珍惜，唔好9up捉鬼，誤傷友軍。 要捉鬼，唔好喺網上捉，係捉就落場去前線捉。喺前線嘅人係唔會有時間去睇Facebook、連登。就算咁好彩比你哋啲冷氣軍師捉中，資訊都唔會去到前線。但係如果捉錯人，就會傷害到真正嘅前線手足。 鬼點都會有，唔會捉得哂。前線手足一定要組小隊行動，唔好落單，唔好輕易相信陌生人，見到有手足比狗咬如果情況許可一定要救人。唔落場嘅，多啲share警察濫用暴力嘅畫面，Facebook／twitter／reddit／Instagram都係你可以發揮功用嘅地方，希望大家唔好再執著喺冇意義嘅捉鬼上面。