Post #161

Ҳажарул асвад тарихи Байтуллоҳ ер устига бино бўлган чоғида Аллоҳ таолонинг амри билан Ҳажарул асвад тоши жаннатдан келтирилди. Байтуллоҳни тавоф қилишда бошлаш ўрни белгиланиши учун уни кун чиқиш бурчагига қўйдилар. Жаннатдан янги чиққан чоғида ўз нури билан бутун Ҳарам ҳудудини, яъни Макка шаҳри ва атрофини ёритар эди. Фатрат замонларида, яъни икки пайғамбар ораси узоқлашиб, дин йўлидан халқлар адашган даврларида ҳам Байтуллоҳни тавоф қилиш одатлари ташланмаган эди. Лекин уларга Байтуллоҳни ҳурмат-одобларини ўргатишга дин олимлари қолмаганликдан, араблар ўз суйганларича тавоф қилар эдилар. Ғусл-таҳорат, сатри-аврат каби диний ишларни халқ унутган эди. Шу сифатлик араб мушриклари, таҳоратсиз эр-хотинлар тавоф қилганларида, одатлари бўйича Ҳажарул асвадга юз-кўз,қўлларини суртишар эди. Мана шу беодобчилик касофатига қолиб кетиб, бу муборак тошдан илгариги ёруғлик нури кўтарилди. Аввалда шам чироғидек оқ нурли бўлиши билан “ Ҳажарул асъад”, яъни “Муборак тош” деб аталган бўлса ҳам, у инсонлар касофатидан нурлари сўниб “Ҳажарул асвад”, яъни “Қора тош” номини кўтарди.Энди бу муборак тош шу сифат билан зоҳирий ҳуснидан ажраган бўлса ҳам, ма’навий файзи илоҳийси абадий ўзида боқийдир. Шунинг учун Пайғамбаримиз(соллаллоҳу алайҳи васаллам): -Қиёмат кунида Аллоҳ таоло Ҳажарул асвадни кўрар кўзлик, сўзлар тиллик қилиб, бурунги ҳусни жамолига қайтаргай, ихлос ила уни зиёрат қилувчиларнинг имонига Аллоҳ олдида гувоҳлик бергай,-дедилар.(Имом Термизий ҳадислари)”Қиёмат кунида ҳамма арвоҳлардан олинган аҳднома Ҳажарул асвадда сақланмушдир”деган ривоят бор. Яна онамиз Ойшадан келган ривоятда: Пайғамбаримиз: -Эй мўъминлар! Ҳажарул асвадни кўп зиёрат қилинглар. Уни ғанимат билинглар, бир кун бўладики, одамлар Байтуллоҳни кечалаб тавоф қиладилар, эрталаб турганларида Ҳажарул асвадни топа олмайдилар. Чунки жаннатдан чиққан барча нарсаларни Аллоҳ таоло қиёмат олдида яна жаннатга қайтаради,-дедилар. Мана, Ҳажарул асвад ҳақидаги қисқача ма’лумот. 🌱🌱🌱🌱🌱🌱🌱🌱🌱🌱 📖Алихонтўра Соғунийнинг Тарихи Муҳаммадий китобларидан олинди. https://t.me/Uzbekxonim