Post #364

​Бироз аввал Спутник V вакцинасининг 2-дозасини қабул қилдим. Фото-видео қилиб ўтирмадим (барибир ишонгиси келмаган ишонмаяптику😊). Бундан 3 ҳафта аввал 1-дозани қабул қилганимда ҳам соғлиғимда ҳеч қандай ўзгариш сезилмади. Умид қиламанки, иккинчиси ундан ҳам яхши ўтади. Шунинг билан тўлиқ вакцина олган бўламан. Мен ўнлаб репортлар ва мақолаларни ўқиб чиқиб, хулосам шуки, вакцина қандай бўлишидан қатъий назар, муқаррар юқиши аниқ бўлган вирусдан ҳеч бўлмаса осон ўтиб олиш учун ягона ҳимоя. Бундан роппа роса 1 йил аввал, июль ойининг бошида бутун оила аъзоларим, энг яқинларим билан бир пайтда Ковид билан курашганмиз. Тошкентда КОВИД титрлари пикка чиқиши бошланаётган пайтлар эди. У пайтда шифокорларнинг ўзи ҳам на бир протокол, на бир дори бўйича бир тўхтамга келишганди. Алғов-далғов паллани бошдан кечирдик: тез ёрдам етиб келмайди, касалхоналарда жой йўқ, кислород аппаратлари нархи бир неча минг долларга етди. Ўша пайтда шу каналда ёзганларим ҳам жуда асабий кечганини ўзим ҳам биламан. (1, 2, 3, 4, 5, 6) Чунки, коронавирус ҳар кимнинг заиф томонига зарба берганди- асабларим ҳам жуда чарчаганди. Тезроқ бу кунлар ўтиб кетса-ю тезроқ вакцина ўйлаб топишса-ю тезроқ олсак деб ёшу қари гапиргани, ёзгани эсимда. Шукр, энг яқинларим соғ-омон. Аммо яқинда мен тенги дугонам Ковид туфайли ёш турмуш ўртоғидан ажраб қолгани вазият ўйлаганимиздан жиддий эканини яна эслатди. Бугун вакциналаш бўйича ҳукуматнинг чақириқларига ишонмаётганлар, вакцинанинг ўзига шубҳа билан қараётганлар кўп. Тушунаман, вакцина билан боғлиқ конспирологик, мантиқсиз қарашлардан кўра (одамларни қириш, умрини камайтириш учун ўйлаб топилган, чиплар жойлаштирилган ва ҳоказо каби уйдирмалар), асосли саволлар ҳам кўп. Масалан, пойтахтнинг ўзида электр таъминотида қанча узилиш бўлаётган бўлса, хориждан келтирилаётган вакциналар ҳудудларда қандай сақланяпти, тиббиёт ходимлари жараёнда қандай ишлаяпти, эмлаш жараёнида фуқаронинг умумий ҳолати ўрганиляптими, эмланганларни электрон базага киритишда узилишлар нега кузатиляпти- бундай саволларга масъул ташкилотлар доим жавоб бериб бориши, аҳолининг вакцинация бўйича барча саволларига жавоб берадиган “горячая линия”, “сall center” лар ишлаши керак, ОАВда тарғибот янаям кучайтирилиши керак. Қайси раҳбарни қандай вакцина олгани ҳақида баҳслашганимиз, игнанинг учи бошқа рангда, “бизни алдашяпти” деб айюҳаннос солганимиз билан бизга, оиламизга заррача фойда йўқ. Ҳаёт-ўзимизники. Бошқалар билан нима ишимиз бор? Қарорни ўзимиз учун чиқарайлик. Ҳар биримизнинг соғлиғимиз ўзимизга керак. Чунки, бу ҳаёт.. яшашга арзийди. @qurbonova_a