Post #370

Бир қизиқ воқеа айтиб берай. Яқинда янги ноутбук олгандим. Талабаликдан ўрганиб қолганмиз (бутун Ўзбекистон ўрганган) – компьютернинг ўзидан пулни аямаймиз, лекин ундаги дастурларга пул сарфлагимиз келмайди. Талабаликда пул бўлмаган, кейин эса ўрганиб қолганмиз, бепул олиш мумкин бўлган нарсага пул тўлагимиз келмай қолган; ёки шунчаки ковлаштириб ўтиришга эринганмиз. Баъзида эса ҳатто пулимизни аямаган тақдиримизда ҳам ўша пулни тўлаш имконияти бўлмайди. Менда шундай бўлди. Янги ноутбукни жуда синчиклаб танлаб, ҳар томонлама кўнгилга ёқадиганини олганим учун ишлатишда ҳам алоҳида меҳр беришга қарор қилдим. Ортиқ қароқчи дастурлардан воз кечаман, контент ва софт учун пул тўлайман, ноутбукни хакерлик дастурлари-ю вирусларга ва хатоларга тўлдирмайман, деган қарорга келдим. Ишни Office пакетидан бошладим – менинг касбимда бу энг кўп ишлатиладиган софт. Word 365 ни, яъни доимий онлайн ишлайдиган, ўз-ўзидан янгиланиб турадиган версияни ўрнатдим. Ойлик тўлови унча катта эмас – 7 доллар. Лекин шуни тўлаш осон бўлмади. Гап шундаки, Microsoft'нинг ўзбекча интерфейсини топиб бўлмади, Ўзбекистонга боғланган тўлов саҳифаси умуман чиқмади. Россия ёки АҚШга мўлжалланган саҳифаларда Ўзбекистоннинг тўлов маълумотларини киритиб бўлмади. Ахийри аллақаердан ўзбекистонликларга мўлжалланган саҳифа топиб, тўлов қилдим. Очиғи, бу сохта саҳифамикин деб гумон қилдим. Шу гумонимни тасдиқлагандай, Word 365 your license isn't genuine деб тураверди. Баъзи функциялар очилмади. Дастурни алдаш ҳам олдингидай осон бўлмай қопти – интернет камёб замонларда бир лицензияни эллик мартаям ишлатардик, ҳеч ким билмасди. MS'нинг сайтини титкилаб, FAQ'ни ўқиб, форумни ўқиб, бирор тайинли жавоб тополмагач, операторга боғландим. Оператор тўлов ўтганини, лекин илгари сохта лицензиялар ишлатганимни, ўша лицензиялар сақланиб қолганини ва дастур ишлашига халақит бераётганини айтди. MS'нинг сайтида махсус дастур бор экан – унга мен ва оператор икки томонлама уландик. У орқали оператор менинг ноутбукимнинг бошқарувини қўлга олиб, эски сохта лицензияларни ўчириб берди. Сифатли хизмат учун миннатдорлик билдириб, шу қаторда Ўзбекистон каби давлатлар учун ҳам нормал тўлов имкониятлари ва сервис жорий этишларини сўрадим. Буни қаранг, Малавидай кўринмас давлатларда ҳам компаниянинг офислари ва сервис марказлари бор экан. Ўзбекистонда эса йўқ. Шармандалик. @AsanovEldar