Post #371

АЁЛ ВА СИЁСАТ Тарихий маълумотларга кўра, Соҳибқирон Амир Темурнинг аёли Сароймулкхоним мамлакатнинг сиёсий-ижтимоий, иқтисодий, маданий ҳаётида катта ўрин тутган. Ҳамда Соҳибқирон жанг сафарларида бўлган вақтида мамлакатни бошқариш ишини ҳам Сароймулкхоним амалга оширган. Бу ўзбек аёлининг нафақат меҳрибон она, жонкуяр турмуш ўртоқ балки давлат ишида ҳам беназир эканидан далолат беради. Куни кеча Миллий тикланиш партияси етакчисининг қоғозга ўраб силлиққина қайд этилган материали эълон қилинди. Унда аёл кишининг мамлакат бошқарувида бўлиши ғарбга тақлид эканлиги, аёл киши миллионлаб одамларнинг ташвишини елкасига ололмаслиги каби асоссиз фикрлар билдирилган. Партия етакчисининг бу фикрлари тўғриси одамнинг кулгусини қистатади. Негаки, фақатгина ғарбда эмас, шарқда ҳам аёл раҳбарлар мамлакатни бип-бинойи бошқарган. Мисол учун, Покистонда Беназир Бҳотта хоним уч марта бош вазир лавозимида ишлаган, Ҳиндистонда Индира Ганди мамлакат бошқарувида катта ўрин тутган аёл бўлган, Сингапур президенти Ҳалима Ёқуб ҳам мамлакатда улкан сиёсий ислоҳотлар қилган, Бангладеш бош вазири Шайх Хасина хоним ҳам давлат сиёсатида муҳим ўзгаришларни амалга оширган аёлдир. Сиёсий лидерлик кишидан кенг билим-тафаккур билан биргаликда кенг дунёқараш, адолат мезонини олтин ўрталиқда ушлаб туришни ҳам талаб этади. Миллий тикланиш партияси етакчисининг ўзбек аёлининг давлат бошқарувига яқинлаштирилмаслик ҳақидаги фикри ана шу олтин ўрталиқка мутлақо зид ҳолат ҳисобланади. Айни даврда дунёнинг турли мамлакатларида аёл кишилар раҳбарлик қилмоқдалар. Буларга Германия канслери Ангела Меркел, Молдова президенти Майя Санду кабилар ҳеч бир эркакдан кам бўлмаган фаолият олиб боришмоқда. Яна шуни ҳам таъкидлаб ўтиш лозимки, сиёсатда ғарб-шарқ, шимол-жануб деган нарса йўқ, сиёсатда биттагина сиёсат бор холос. Шуни ёдда тутиш лозим, Тўмарис у Бибихонимлар авлоди бўлган ўзбек аёли ҳам беъмалол давлат бошқарувида фаолият юрита олади. Фақат ўзбек аёлига ишонч билдирилса бас, у ҳатто елкасида тоғларнида кўтаради. Давлат бошқаруви ҳам оила бошқаруви каби иш. Эри урушга кетиб қайтмаган момоларимиз ўнлаб фарзандларини ўқитиб, уйли жойли қилган, ҳаётда ўз ўрнини топишига сабабчи бўлган. Бунга ўзининг мустаҳкам иродаси билан кўмак берган. Шундай экан, ўзбек аёлини сиёсатдан, давлат бошқарувидан узоқ бўлсин, уни қадрлайверамиз дейиш, сафсатадан бошқа нарса эмас. Фурқат Алимардон