@uzstandardchannel · Post #13466 · 10/08/2025, 05:39 AM
O‘zbekiston vakili xalqaro BIPM–TÜBİTAK UME dasturi doirasidagi seminarda muvaffaqiyatli ishtirok etdi ✅ Yaqinda Xalqaro o‘lchov va tarozilar byurosi (BIPM) hamda Turkiya Milliy Metrologiya instituti (TÜBİTAK UME) hamkorligida amalga oshirilayotgan “BIPM – TÜBİTAK UME Project Placements” xalqaro dasturining 8-bosqichi doirasida gibrid shakldagi o‘quv mashg‘uloti bo‘lib o‘tdi. ✅ Mazkur dastur 2018-yildan buyon muvaffaqiyatli amalga oshirilib kelinmoqda va bugungi kunga qadar 43 mamlakatdan 77 nafar tadqiqotchini birlashtirgan. Dastur milliy metrologiya institutlarining ilmiy-texnik salohiyatini oshirish, xalqaro hamkorlikni rivojlantirish hamda metrologiya sohasidagi mutaxassislar malakasini yuksaltirishga qaratilgan. ✅ Seminarda BIPMning Xalqaro aloqalar va kommunikatsiyalar bo‘limi vakillari Anna Sipionka va Chingis Kuanbayev ishtirok etdilar. Tadbir davomida xalqaro metrologiya tizimi va o‘lchov institutlarining o‘zaro tan olinishi uchun asos bo‘luvchi CIPM o‘zaro tan olish kelishuvi (CIPM MRA) haqida batafsil ma’lumot berildi. Dastur doirasida Albaniya, Ozarbayjon, Bosniya va Gersegovina, Kolumbiya, Malayziya, Misr, Norvegiya, O‘zbekiston, Ukraina va Vetnamdan jami 10 nafar mutaxassis ishtirok etdi. ✅ Seminarda O‘zbekiston texnik jihatdan tartibga solish agentligi huzuridagi O‘zbekiston milliy metrologiya instituti Xorazm filiali mutaxassisi Sh. Kadirov “Tibbiy metrologiya” yo‘nalishi bo‘yicha o‘z ma’ruzasi bilan faol ishtirok etdi. Uning ishtiroki mamlakatimizning xalqaro ilmiy hamjamiyat bilan integratsiyalashuvini chuqurlashtirish, shuningdek, zamonaviy metrologik infratuzilmani yanada takomillashtirish yo‘lidagi izchil sa’y-harakatlarini ifodaladi. ✅ Tadbir davomida ishtirokchilarga o‘zaro tajriba almashish, metrologiya sohasidagi dolzarb masalalarni muhokama etish, shuningdek, yetakchi xalqaro laboratoriyalarda qo‘llanilayotgan ilg‘or uslub va amaliyotlar bilan tanishish imkoniyati yaratildi. #UzNIM#BIPM#TUBITAK_UME#CBKT#hududiy_filiallar 🌐standart.uz | Facebook | Instagram | YouTube