Post #2481

Piskent poligonida avtomobil sinovlari to‘xtatildi 2025-yil 2-sentabrdan boshlab avtomobillarni Piskent sinov majmuasida sinovdan o‘tkazish amaliyoti to‘xtatildi. Bu haqda Texnik jihatdan tartibga solish agentligi xabar berdi. Ma’lumotlarga ko‘ra, mazkur tartib 2024-yil 1-noyabrda joriy etilgan paytda respublika bo‘yicha atigi 3 ta dilerlik markazi faoliyat yuritgan bo‘lsa, bugungi kunga kelib 21 ta xorijiy kompaniyaning rasmiy dilerlari ish boshlagan. Ularga 100 dan ortiq avtomobil rusumlari bo‘yicha turini ma’qullash hujjatlari rasmiylashtirilgan. “Respublikamizda rasmiy dilerlar va servis markazlari soni keskin oshgani, shuningdek, iste’molchilarning bevosita rasmiy dilerlar bilan ishlash amaliyoti yo‘lga qo‘yilgani inobatga olinib, Piskent avtopoligonida avtomobil sinovlarini o‘tkazish amaliyotiga ehtiyoj qolmadi”, – deyiladi agentlik bayonotida. Eslatib o‘tamiz, yil boshida Piskent tumanidagi avtomobil sinov poligonida uzun navbatlar yuzaga kelib, jiddiy e’tirozlarga sabab bo‘lgandi. Avtomobil egalari bir dona elektromobilni sertifikatlash uchun 4,48 mln so‘m, benzin, dizel yoki gibrid avtomobillar uchun esa 5,6 mln so‘m to‘lashgan. 🔰Telegram | Instagram | You Tube