Post #2300

САМАРҚАНДЛИК 4 НАФАР БИТИРУВЧИ 4 ЁШЛИ ШУКРОНАНИНГ ҲАЁТИНИ САҚЛАБ ҚОЛИШДИ Улар Самарқанд шаҳридаги 80-мактабнинг ўқувчилари. Жорий йилнинг 1 июнь куни 11-синфини битираётган Шоҳрух, Мурод, Озод ва Жасур илк давлат имтиҳонини топшириб, сайр қилишга қарор қилишди ва шаҳардаги кўп қаватли уйлардан бири ёнида ўтириб, суҳбат қилишди. Тўсатдан улар эътиборини турар-жой биносининг тўртинчи қавати ўзига тортади. Диққат билан юқорига қараган йигитлар, боши панжара орасига тиқилиб қолиб, танаси ҳавода осилиб турган Шукронани кўришди. Ўқувчилардан бири дарҳол қизалоқнинг ота-онасига хабар бериш учун квартира томон югурди, аммо улгурмади, Шукрона пастга тушиб кетди. Кўчада турган учовлон уни қўллари билан тирик қутқарув панжарасини ҳосил қилиб, ушлаб олишди. Аниқланишича, онаси уй ишлари билан овора бўлиб юрган пайтда, Шукрона эшик қулфи бузилиб қолган балконга чиқиб қолган экан. Йигитларнинг саъй-ҳаракатлари натижасида қизалоқ пешонасида кичик ёриқ енгил жароҳатини олди. 4 қаҳрамон ҳар куни унинг ҳолидан хабар олишни ҳам канда қилишмади. Ҳозир Шукронанинг аҳволи яхши, Шоҳрух Бобораҳимов, Мурод Саидалимов, Озод Ўткиров ва Жасур Эшназаровлар эса мактабда қолган имтиҳонлардан ўтиб, олий ўқув юртига киришга ҳозирлик кўришмоқда. Асосийси, улар ҳаётларидаги энг муҳим синовдан аъло баҳо билан ўтиб, Шукронанинг ҳаётида бир умрлик қаҳрамонга айланишди. Баракалла болалар, келгусидаги ишларингизда ва барча ҳаёт синовларини мана шундай мардонавор енгиб ўтишда сизларга омад ва бахт хамроҳ бўлсин, Иллоҳим!