Post #2324

“Фарзандимдан доим хавотирда яшайман…” Ривожланишда нуқсони бор фарзандни дунёга келиши, уни тарбиялаб вояга етказиш зиммасига тушган оила учун ҳаётнинг жуда оғир синовидир... Афсуски бу синовлардан ҳамма оила ҳам ўта олмайди, лекин шундай оилалар борки, улар бундай синовларни мардонавор енгиб, келажакка улкан мақсадлар билан боришмоқда. Бугун бундай болаларнинг жамиятда ўз ўрниларига эга бўлишлари учун инклюзив таълим соҳасини ривожлантириш йўлида ҳам катта қадамлар қўйилган. Яқинда бир дугонам фарзанди ўқийдиган мактабда инклюзив синф очилаётганидан у ва бошқа ота-оналар норозилигини билдири. Унга индивидуал тарзда бу нима учун кераклиги, ривожланган давлатларда болалар мана шундай бир бутун муҳитда таълим олаётганликларини имкон қадар тушунтиришга ҳаракат қилдим ва бунга эришиш учун вақт ва катта куч ва сабр кераклигини яна бир бор англаб етдим. Бугун Республика ташхис Марказида умумтаълим мактабларида инклюзив таълимга қамраб олинган болажонлар ва уларнинг ота-оналари учун тренинг ташкил этилди. Бир гуруҳ кўнгилли талабалар болажонлар билан турли интерфаол ўйинлар ўтказишган бўлса, Марказ психологлари ота-оналар учун психологик тренинглар ўтказишди. Кўплаб тадқиқотларда аниқланишича, бундай болаларнинг ота-оналари доимий стресс, айбдорлик, ҳаётдан хафаликни ҳис қилиб яшар эканлар. Шу боис бугун илк бор ташкил этилган ушбу тадбир ота-оналар учун айни муддао бўлди деб ўйлайман. Бугунги тадбир баҳона ота-оналарнинг фарзандларининг инклюзив таълимдаги натижалари билан қизиқдим. Улар билан кўпроқ гаплашсангиз кўзларидаги кўз ёшларини ҳам кўрасиз. Сабрингиз учун раҳмат, азиз ота-оналар! Иншоллоҳ бир кун меҳнатларингиз ва сабрингиз учун Аллоҳим сизларни мукофотлайди🤲