Post #1158

Зейнетақы қаражатын ем алу мақсатында шешіп алу бағытында аномалды өсімнің жаңа түрі анықталды 2025 жылдың қарашасында реконструктивтік және қалпына келтіру операцияларына, басқаша айтқанда, пластикалық операцияларға төлем жасау үшін біржолғы зейнетақы төлемдерін шешіп алуға арналған 2 277 өтініш орындалды. Орындалған өтініштердің жалпы сомасы шамамен 2,1 млрд тг құрады. Өткен аймен салыстырғанда бұл көрсеткіштер, тиісінше, шамамен 33 және 39 есеге өсті - зейнетақы қаражатын алу мақсаттарының ішінде пластикалық операциялар осы уақытқа дейін осыншалықты көп сұралатын себеп болмаған еді. Масштабты түсіну үшін айта кетейік: бағдарлама басталғалы бері және 1 қарашаға дейін жалпы орындалған өтініштер саны 1 631 бірлікке жеткен. Ал сомасы 1,6 млрд тг жетпеген, яғни барлық уақыттағы жиынтық көлем бір ғана өткен айдағыдан аз болып тұр. Жалпы ем алу мақсатында алынатын төлемдердегі күрт өсімнің жаңа арналары қыркүйекте бұған дейін негізгі бағыттың бірі болған стоматология бойынша өтініш қабылдау тоқтатылғаннан кейін байқала бастады. Себебі - көптеген жалған өтініштердің анықталуы. «Тіс» бағытына тыйым салынғаннан кейін офтальмология бойынша көрсеткіштердің өсуі тіркеле бастады. Бұл туралы біз қыркүйек және қазан айларының қорытындыcы бойынша жазғанбыз. Алайда офтальмологияда да бәрі бірдей дұрыс болмай шықты: желтоқсанның басында «Отбасы» банк «көзге» байланысты өтініштер қабылдауды да тоқтататынын хабарлады. Себебі түсінікті: күмәнді өтініштер қайта анықталған. Соған қарамастан, қарашада офтальмология бойынша шамамен 9,8 мың өтініш орындалған, жалпы сомасы 8,4 млрд тг болды. Алайда бұл көрсеткіштер қазанмен салыстырғанда шамамен үштен бірге төмен болды, оның есесіне орындалған өтініштер бойынша қайтарулар өсе бастады. Мұндай қайтарулардың бір себебі қаражаттың мақсатсыз пайдаланылуы болуы мүмкін. Айтпақшы, жаңа өтініштер екі ай бойы орындалмай жатқан стоматологияда да қайтарулар жалғасуда. Ал пластикалық операциялар бойынша қайтару көрсеткіштері әзірге төмен деңгейде қалып отыр. Аталған бағыттар бойынша емге арналған зейнетақы төлемдерінің «оқиғаларын» төмендегі графиктен көре аласыздар. Сонымен қатар тұрғын үй үшін зейнетақы қаражатын алу динамикасымен де танысуға болады - бұл көрсеткіштер жоғары деңгейді ұстап тұр. Есептеулер БЖЗҚ деректері бойынша жасалған @DataHub_KZ