Post #458

Халықтың алтынға салған инвестициясы екі есеге көбейді Қаңтар-қыркүйек айларында қазақстандықтар жалпы салмағы 2,1 мың кг болатын алтын құймаларын сатып алған. Бұл 2023 ж. аталған кезеңімен салыстырғанда 90%-ға артық деуге болады және кем дегенде 4 жылдағы ең жоғары көрсеткіш. Сұраныстың негізгі бөлігін (77%) алғашқы екі тоқсанның көрсеткіші құрады, сондай-ақ екеуінікін де бірдей деуге болады: І тоқсанда – 816,4 кг, ІІ тоқсанда – 779,2 кг. Сәйкесінше, ІІІ тоқсанға тек 23% немесе 475,5 кг тиесілі. Соңғы нәтиже аз болып көрінгенімен, тарихи тұрғыдан алғанда олай емес. Егер тиісті көрсеткіштерді алтынның орташа тоқсандық бағасына көбейтсек, халықтың 9 ай ішінде қымбат металға салған инвестициясы 68,6 млрд тг құрағанын көруге болады. Аталған сома өткен жылмен салыстырғанда номиналды түрде 2,2 есеге көп. Қызықты ақпарат: қазақстандықтар 50 граммдық құймаларға қызығушылық таныта бастаған сыңайлы. ІІІ тоқсанда олардың сатылымы барлық сатылымның 40%-ын құрады – 5,5 мың дана. Дереккөз: ҚР Ұлттық банкі @DataHub_KZ