Post #717

Қызметтер шамамен 2,5 жылдағы ең жоғары айлық қарқынмен қымбаттады Ақпанда ақылы қызметтердің бағасы қаңтармен салыстырғанда 2,1%-ға өсті. Осылайша айлық сервистік инфляция 1 п.т. жеделдеп, 2022 жылғы қыркүйектен бергі ең жоғары деңгейге жетті (ол кезде 2,7% болған). Ақылы қызметтер бағасының негізгі өсім драйверлерінің бірі – суық су. Бір айда бір текше метр су құны бірден 29,2%-ға артты. Тарифтердің қымбаттауы тоғыз өңірде байқалды, оның төртеуінде өсім 50%-дан асып түсті. Атап айтқанда, Астана (+83,1%), Солтүстік Қазақстан (+63,5%), Батыс Қазақстан (+58,4%) және Қостанай (+55,5%) облыстары. Айта кетейік, қалған коммуналдық қызмет тарифтері де өскен, бірақ әлдеқайда аз. Орталық жылыту жүйесінің бағасы 6,2%-ға, ыстық су 5,3%-ға, домофон қызметі 4,7%-ға, электр энергиясы 1,8%-ға қымбаттады. Бұған дейін жазғанымыздай, Қазақстанда ТКШ тарифтерінің өсуі 2023 жылдан бері жалғасуда. Мұндай үрдіс тозығы жеткен коммуналдық инфрақұрылым мәселесін шешуге бағытталған «Тарифті инвестицияға айырбастау» бағдарламасының қайта іске қосылуымен байланысты. Ақылы қызметтерден бөлек, инфляцияның басқа компоненттері де айтарлықтай айлық өсім көрсетті: азық-түлік тауарлары – 1,5%-ға (соңғы 26 айдағы ең жоғары мән), азық-түлікке жатпайтын тауарлар – 1%-ға (соңғы 22 айдағы ең жоғары мән). Нәтижесінде, жалпы баға өсімі алдыңғы аймен салыстырғанда 1,5%-ды құрап, 0,4 п.т. жеделдеді. Бұдан жоғары қарқын соңғы рет 2022 жылғы қазанда тіркелген еді. Сонымен қатар жылдық деңгейде инфляция 2024 жылғы қаңтардан бергі ең жоғары деңгейге дейін жеделдеді – 9,4%. Өткен аймен салыстырғанда өсім 0,5 п.т. құрады. ҚР СЖРА ҰСБ деректері @DataHub_KZ