Post #746

Бағдаршамның тыйым салатын сигналына өту жағдайларын тіркеу айтарлықтай өскен Қаңтар-ақпан айларында ҚР ӘҚБтК-нің 599-бабы «Бағдаршамның тыйым салатын сигналына немесе реттеушінің тыйым салатын қимылына қарамай өту» бойынша 106 мың құқық бұзушылық тіркелген. 2024 жылдың осы кезеңімен салыстырғанда өсім алты есеге жуықтады. Салыстыру үшін: бір жыл бұрын бұл көрсеткіш 1,5 есеге артқан еді. Бұл мәліметтерді ҚР БП ҚСжАЕК ұсынды. Бағдаршамның тыйым салатын сигналына өту жағдайларын анықтау өткен жылдан бастап қарқынды түрде өсіп келеді. 2024 жылдың қорытындысы бойынша бұл көрсеткіш жылдан жылға бірден үш есеге артты. Бұл соңғы бес жылдағы алғашқы осындай күрт өсім: 2020-дан 2023-ке дейін жыл сайынғы өсім 41%-дан аспаған. Осылайша, көрсеткіштің өсу үрдісінің тек жалғасын тауып қана қойғаны жөнінде емес, үдей түсуі жайында да айтуға болады. ҚР ӘҚБтК 599-бабы бойынша құқық бұзушылықтарды тіркеудің жиілеп кетуі шынайы өмірде орын алып жатқан әртүрлі жағдайларды көрсетуі мүмкін. Ең алдымен, бағдаршамның тыйым салатын сигналына өту жағдайлары негізінен елді мекендердегі жолға орнатылған бейнебақылау камералары арқылы тіркелетінін атап өткен жөн. Мысалы, 2024 жылы ҚР ӘҚБтК 599-бабы бойынша барлық құқық бұзушылықтардың 86%-ы бейнефиксация көмегімен анықталған. Осыған сүйене отырып, байқалып отырған күрт өсім жол қиылыстарын бейнебақылаумен қамтудың кеңеюімен байланысты болуы мүмкін деп болжауға болады. Бұл гипотезаны жанама түрде ашық дереккөздерден алынған ақпарат растайды: 2024 жылдың толық емес кезеңінде жолдағы камералардың жалпы саны шамамен 3 мыңға артып, 22 мыңнан 25 мыңға дейін жеткен. Дегенмен, жұмыс істеп тұрған камералардың нақты саны қалай өзгергені туралы деректер жоқ. Келесі себеп те камералардың жұмысына байланысты болуы мүмкін. 2024 жылдың наурызында Астанада камералардың сары түске өту жағдайларын тіркей бастағаны хабарланған еді. ЖҚЕ бойынша сары түс те тыйым салатын сигнал болып саналады, тек шұғыл тоқтау мүмкін болмаған жағдайлардан басқа кезде. Пилоттық режимде бұл жаңашылдық Алматы мен Шымкентке де енгізіледі деп күтілді. Маусымда эксперимент басталғалы бері елордада сарыға өткен 18 мың жағдай анықталғаны белгілі болды. БАҚ материалдарындағы пилоттық жобаның аралық нәтижелері туралы барлық ақпарат осы ғана деуге болады. Екінші жағынан, жолдардағы көлік құралдарының көбеюі де бұл өсімге ықпал етуі мүмкін. Мысалы, бір жылда, 2024 жылдың 1 наурызынан 2025 жылдың 1 наурызына дейін тіркелген көлік саны 412,8 мың бірлікке артқан. Ал бір жыл бұрын бұл көрсеткіш бұдан да жоғары болған еді – 794,3 мың бірлік. Түптің түбінде, жүргізушілердің жалпы тәртібінің нашарлауы ықтималдығын да жоққа шығаруға болмайды. ‼️ Қалай болғанда да, қызыл және сары түске өту жағдайларының күрт артуының нақты себептері белгісіз екені анық. Бұл жерде негізгі себеп аталған факторлардың біреуі немесе олардың әртүрлі комбинациядағы жиынтығы да болуы мүмкін. Сонымен қатар біздің назарымыздан тыс қалған, бір қарағанда айқын көрінбейтін басқа да факторлар болуы әбден мүмкін. Жалпы көріністі толықтыру үшін айта кетсек, кейбір басқа жол қозғалысы ережелерін бұзу жағдайларының да бірнеше есеге артқаны байқалады. Мәселен, өткен жылдың қаңтар-ақпан айларына қарағанда жүргізушілердің көлік құралдарын тоқтату немесе тоқтап тұру қағидаларын бұзу (ҚР ӘҚБтК 597-бап) фактілерін тіркеу 2,4 есеге өскен. Сондай-ақ, жол белгiлерiмен немесе жолдың жүру бөлiгiндегi таңбалармен көрсетiлген талаптарды сақтамау жағдайлары да (ҚР ӘҚБтК 601-бап) дәл осындай қарқынмен артқан. @DataHub_KZ