Post #945

Қазақстанда рекордтық мөлшерде пәтер пайдалануға берілді Қаңтар-маусым айларында пайдалануға берілген тұрғын үйлердегі пәтерлер саны 72,3 мыңды құрады. ҚР СЖРА ҰСБ деректеріне сүйенсек, бұл - кем дегенде соңғы жеті жылдағы алғашқы жартыжылдық үшін ең жоғары көрсеткіш. 2024 жылдың дәл сол кезеңіне қарағанда өсім 7,1%-ды немесе 4,8 мыңды құрады. Жылдан жылға оң динамика тұрақты түрде сақталып келеді: осындай өсім қарқыны бір жыл бұрын да тіркелген, +6,9%. Жалпы алғанда, 2019 жылдан бастап алты айдың қорытындысы бойынша жылдық төмендеу тек екі рет болды: 2019 жылы (-1,5%) және 2022 жылы (-2%). Қалған жылдары көрсеткіш өсіп отырды. Тақырыпты жалғастыра келе, 20 өңірдің 15-інде пәтерлерді пайдалануға беру көлемінің артқанын айтып кетуге болады. Соның ішінде жылдан жылға ең көп өсім Алматы қаласында тіркелген, +1,9 мың. Одан кейін Шымкент пен Түркістан облысы, әрқайсысы +0,9 мыңнан қосқан. Ал ең үлкен төмендеу Астана қаласында байқалды: -1,1 мың. Жалпы алғанда, екі ірі мегаполис - Алматы мен Астана - пәтерлерді пайдалануға берудің 47%-ын қамтамасыз еткен. Тағы бір назар аударатын жайт, әдетте жылдың бірінші жартыжылдығында екіншісіне қарағанда пәтер азырақ пайдалануға беріледі. 2019-2024 жылдар аралығында қаңтар-маусым айларына жылдық көлемнің 37%-дан 42%-ға дейінгі үлесі тиесілі болған. Айтпақшы, рекордтық көрсеткіш тұрғын үйлердің жалпы ауданы бойынша да тіркелді - 7,9 млн шаршы метр. Бұл - кем дегенде 2015 жылдан бергі қаңтар-маусым кезеңі үшін ең жоғары мән. 2024 жылдың алғашқы жартыжылдығымен салыстырғанда өсім 6,6%-ды құрады. Қорытындылай келе, бір маңызды әдістемелік жайтты нақтылай кетейік. Ресми статистикада "пәтер" ұғымы жеке тұрғын үйді білдіреді - көпқабатты тұрғын үйдегі пәтер, жеке тұрғын үй немесе жатақханадағы бөлме. @DataHub_KZ