Post #952

Жеке тұлғалардың депозиттері бойынша мөлшерлемелер 28 жылдан астам уақыттағы рекордтық деңгейде қалып отыр Маусымда ЕДБ-лардың жеке тұлғалардан теңгемен тартылған депозиттері бойынша орташа өлшенген сыйақы мөлшерлемесі мамырмен салыстырғанда өзгерген жоқ — 14,2%. Соңғы екі айдағы деңгейі — ҚР ҰБ деректеріне сүйенсек, 1996 жылдың желтоқсанынан бергі ең жоғары көрсеткіш. Назар аударатын жайт, мамырдағы көрсеткіш «респонденттердің есептеріндегі өзгерістерге» байланысты төмендетіліп қайта қаралды. Осы түзетудің нәтижесінде көрсеткіш 0,1 п.т. төмендеді (алдыңғы жарияланымда нақтыланбаған деректермен 14,3% деп көрсетілген болатын). Бұған дейін мөлшерлемелер қаңтардан мамырға дейін, ақпанды қоспағанда (-0,2 п.т.), өсіп отырған болатын. Алғашқыда оң динамика ақша-кредит саясатының қатаңдатылуымен байланысты болды: 2024 жылдың желтоқсанында Ұлттық банк базалық мөлшерлемені 1 п.т., ал наурызда тағы 1,25 п.т. көтерді. Алайда одан кейін монетарлық жағдай өзгерген жоқ — сәуір, маусым және шілде айларында реттеуші базалық мөлшерлемені өзгертпеді. Қазіргі деңгейі — 16,5%. Маусымда жеке тұлғалар үшін ең тиімдісі 1-3 ай мерзімге банктен депозит ашу болды — 16,3%. Айта кетсек, дәл осындай сыйақы мамырда да болды. Банкке жатпайтын заңды тұлғалар бойынша депозит мөлшерлемелері үш ай қатарынан өзгеріссіз қалып отыр — 15,4%. Бұдан жоғары мән соңғы рет 2016 жылдың қаңтарында тіркелген болатын. Ал қарыз қаражатының құны қалай өзгерді? Маусымда ЕДБ-ның жеке тұлғаларға теңгемен берген несиелері бойынша орташа өлшенген сыйақы мөлшерлемесі соңғы алты айдағы ең төменгі деңгейге жетті — 20,3%, мамырмен салыстырғанда 1,2 п.т. төмендеген. Мұндай өзгерісті көрсеткішке пайызсыз бөліп төлеудің жалпы несие көлеміндегі үлесінің өзгеруі әсер еткенімен түсіндіруге болады. Бұл ретте заңды тұлғаларға берілген несиелер бойынша мөлшерлеме бір айда 0,4 п.т. өсіп, 19,1%-ды құрады. Соңғы рет бұдан жоғары көрсеткіш 2023 жылдың қазанында, сондай-ақ 2025 жылдың сәуірінде тіркелген болатын. @DataHub_KZ