@toshkentaero_official · Post #8656 · 28.03.2026 г., 15:12
Tadbir doirasida Komissiya raisi Jamshid Xodjayev yil boshidan buyon “Ochiq muloqot” formatida tadbirkorlar ko‘tarayotgan tizimli masalalar muntazam ko‘rib chiqilayotgani va ularni hal etish bo‘yicha amaliy choralar ko‘rilayotganini qayd etdi. Uning so‘zlariga ko‘ra, O‘zbekistonda ishlab chiqarilishi allaqachon yo‘lga qo‘yilgan mahsulotlarga o‘xshash tovarlar importining o‘sishi mahalliy ishlab chiqaruvchilar uchun asosiy muammolardan biri bo‘lib qolmoqda. Bu esa ichki bozorda raqobatni kuchaytirib, ayrim hollarda mahalliy ishlab chiqarishni iqtisodiy jihatdan manfaatsiz qilib qo‘yadi. Bunday vaziyatning sabablaridan biri tarif inversiyasi ekani, ya’ni tayyor mahsulotlar importiga ularni mamlakat ichida ishlab chiqarish uchun zarur bo‘lgan xomashyo va materiallarga nisbatan pastroq stavkalarda boj solinayotgani alohida ta’kidlandi. Qayd etilganidek, bu holat tannarxning oshishiga, mahalliy mahsulotlar raqobatbardoshligining pasayishiga va ishlab chiqarish quvvatlaridan to‘liq foydalanilmasligiga olib keladi. Buni ayniqsa qandolat mahsulotlari va elektromotorollerlar misolida yaqqol ko‘rish mumkin. Shuningdek, Komissiya raisi mahalliy ishlab chiqaruvchilarni qo‘llab-quvvatlash maqsadida yangi tajriba mexanizmi ishlab chiqilayotganini ma’lum qildi. U ayrim turdagi mahsulotlarni ishlab chiqarish uchun xomashyoni bojsiz import qilishni, so‘ngra uni qayta ishlab, tayyor mahsulotni ichki bozorda import bilan teng sharoitlarda sotishni nazarda tutadi. U ushbu yondashuv samaradorligi tadbirkorlarning yaratilayotgan imkoniyatlardan ishlab chiqarishni kengaytirish, bandlikni oshirish va soliq tushumlarini ko‘paytirish uchun qay darajada faol foydalana olishiga bog‘liq bo‘lishini ta’kidladi. KANALGA OBUNA BO‘LING #ochiqmuloqot #oziqovqatsanoati#qandolatmahsulotlari #JSTkomissiyasi