Post #1530

*** Бизни алдайверар яна ўша Дард, Бизни аврайверар таниш туйғулар. Руҳим осмонидан боқаман карахт Ҳаммаси ёлғонки-ёлғон туюлар. Қалбда бир чўғ асраб келдим ҳар нафас, Лаҳзада баридан тонмоғим мумкин. Дунёни хашакдек тўзғитиб бесас, Денгиз тубинда ҳам ёнмоғим мумкин. Фақат сенга оғир жудаям оғир, Ҳирслар дарёсида сузмаган гулим. Мангу кундузларни ахтариб, охир- Кўнглим кечасида бўзлаган гулим. Мен эса... Ўзимда ўзимдан сархуш, Дунёим ичинда дундан бегона. Ўзимнинг даштимда ягона дарвеш, Ўзимнинг Лайлимга ўзим девона. Раҳимжон Али 2014 @Rahimjon_Aliy