Post #2264

Бугунги ялпи мажлисда кўпчилик учун қизиқ ва муҳим аҳамиятга эга тармоқни тартибга солишга қаратилган қонун лойиҳасини биринчи ўқишда кўриб чиқдик. Ушбу қонун лойиҳаси билан автомобиль йўлларини тартибга солиш мақсадида қарийб 18 йил аввал қабул қилинган “Автомобиль йўллари тўғрисида”ги қонуннинг янги таҳрирдагисини қабул қилиш кўзда тутилган. Автомобиль йўлларининг ҳолати, унинг таъмирланиши, унда хавфсизлик қоидалари ўрнатилиши - доимо ҳаммамизнинг эътибор марказимизда бўлиб келган. Айниқса, одамларимизнинг эҳтиёжлари, истаклари, дунёқараши ва талаби ўсиб бораётган бугунги замонда ушбу соҳани мувофиқлаштирувчи қонун ҳам замон талабига тўлиқ мос бўлишини таъминлаш биз, депутатларнинг зиммамизлаги муҳим вазифалардан бири ҳисобланади. Хусусан, йўл ҳаракати иштирокчиларига барча қулайликлар яратилган “пулли йўллар” қандай бўлиши кераклигини, автомобиль йўлларини таъмирлаш, сақлаш ёки реконструкция қилувчиларнинг ваколатлари аниқ белгиланиши қонун билан тартибга солинадиган вақт аллақачон келган. Бизнинг фракция ҳам бу борада ўзининг қатъий позициясига эга: йўл соҳасига инвестицияларни, шу жумладан тўғридан-тўғри хорижий инвестицияларни жалб қилиш борасидаги ишларни янада жадаллаштириш лозим. Боиси пуллик йўлларни лойиҳалаш, қуриш, реконструкция қилиш, эксплуатация қилиш ва улардан фойдаланиш учун ажратиладиган бюджет маблағларини (харажатларини) сезиларли даражада камайтиради. Яна бир муҳим жиҳати шундаки, пуллик автомобиль йўлининг қурилиши муқобил бепул автомобиль йўли мавжуд бўлгандагина амалга оширилади. Хуллас, янгича талаб ва қоидалар маънан эскирган қонунни янгилаш заруратини юзага келтирмоқда. Шу боис биринчи ўқишда кўриб чиқилган қонун лойиҳасини концептуал жиҳатдан маъқулладик ва бошқаларни ҳам уни қўллаб-қувватлашга ундадик. Adolat.uz | Facebook | Telegram | Instagram