Post #3154

🟦🟦🟦 ХАЛҚАРО АЁЛ СУДЬЯЛАР КУНИ МУБОРАК БЎЛСИН! Муҳтарама аёл судьялар! Қадрли соҳа фахрийлари ва азиз ҳамкасблар! 🔴 Барчангизни 10 март – Халқаро аёл судьялар куни муносабати билан “Адолат” СДП Сиёсий Кенгаши ҳамда кўп сонли партиядошларимиз номидан муборакбод этамиз! Албатта, бугунги байрам жамиятимизда адолат мезонларини ўрнатишда аёл зотининг нақадар муҳим ўрин тутишини эътироф этиш кунидир. Зеро, судьялик мақоми зиммасида инсон тақдири ва давлат барқарорлиги турган юксак масъулият ҳисобланади. Аёл судьянинг фаолияти эса тизимнинг нафақат қатъияти, балки унинг виждони ва инсонпарварлик тимсолидир. Тарихимизга назар солсак, XII асрда яшаган Самарқанднинг буюк фақиҳаси Фотима ас-Самарқандий, Мисрда "Илм нафисаси" дея эътироф этилган Саида Нафиса каби оқила аждодларимизнинг адолатли сўзи билан энг чигал низолар барҳам топганига гувоҳ бўламиз. Бугунги замондош аёл судьяларимиз мана шундай бой маънавий мероснинг муносиб давомчилари сифатида, ўзларининг оналик меҳри ва касбий матонати билан энг мураккаб тақдирларни тўғри йўлга солаётганлари ҳар қандай таҳсинга лойиқдир. Давлатимиз раҳбари томонидан суд ҳокимиятининг мустақиллигини таъминлаш ва хотин-қизларнинг давлат бошқарувидаги ролини ошириш борасида олиб борилаётган ислоҳотлар бугун ўз мевасини бермоқда. Бир гуруҳ аёл судьяларимизнинг юксак давлат мукофотлари билан тақдирланиши ҳамда Халқаро аёл судьялар ассоциацияси аъзолигидек юксак мақомга сазовор бўлиши тизимда фидокорона меҳнат қилаётган барча аёл-қизларимизга бўлган юксак ишонч ва эҳтиром рамзидир. Азиз ҳамкасблар! Маълумки, аёл судья ҳар бир далилни нафақат қонун нуқтаи назаридан, балки қалб билан ҳам ўрганади. Сиз чиқараётган ҳар бир қарор замирида оиланинг тақдири, болалар келажаги ва жамиятдаги адолат тантанаси мужассам. “Адолат” партияси сизнинг бу шарафли йўлдаги фаолиятингизни, ҳуқуқшуносликка қадам қўяётган ёш қизларимиз учун “устоз-шогирд” анъаналарини ривожлантиришингизни ҳамиша қўллаб-қувватлайди. Мақсадимиз — хотин-қизларимизнинг тазйиқ ва зўравонликка учрамаслиги, оила пойдевори дарз кетмаслиги ва жамиятда юксак ҳуқуқий маданият қарор топишидир. Бу йўлда сизнинг билим ва иродангиз, мағрур ва енгилмас қиёфангиз биз учун маънавий куч манбаи бўлиб хизмат қилади. Фурсатдан фойдаланиб, барчангизга мустаҳкам соғлик, оилавий бахт ва масъулиятли фаолиятингизда янги зафарлар тилайман. Хонадонингиздан тинчлик-хотиржамлик, қалбингиздан эса адолат ва эзгулик зиёси аримасин. Байрамингиз муборак бўлсин, адолат посбонлари!