Post #3186

"Адолат" СДП марказий аппаратида байрамолди хайрия ҳашари ташкиллаштирилди Ҳашар — халқимизга хос асрий анъана. Ҳудудларни кўкаламзорлаштириш, кўклам олдидан ободонлаштириш, кўчат экиш ва атроф-муҳитга меҳр бериш авлодлардан авлодларга ўтиб келаётган муқаддас қадрият ҳисобланади. Наврўз айёми арафасида кезаётган янгиланиш нафаси ҳар бир кўнгилга яратувчанлик завқини бағишламоқда. Мамлакатимизда кечаётган "Яшил макон" лойиҳаси ҳамда Вазирлар Маҳкамасининг тегишли фармойиши ижросини таъминлаш мақсадида бугун "Адолат" СДП Сиёсий Кенгаши марказий аппарати жамоаси ҳам эзгу ташаббусга қўшилди. "Юрт ободлиги, аввало, маҳалладан бошланади" шиори остида бирлашган партия раҳбарияти вакиллари, Олий Мажлис Қонунчилик палатасидаги депутатлар, Ёшлар парламенти аъзолари, аппарат раҳбар-ходимлари, фаоллар эрта тонгдан қўлларига иш қуролларини олиб, ҳудудни ободонлаштиришга киришдилар. Жараён давомида бино атрофи тартибга келтирилди. Дарахтлар оқланиб, яшил майдонларга шакл берилди, бегона ўтлардан тозаланган ерларга янги ниҳол кўчатлари қадалди. Бу жамоавий меҳнат партия ходимлари ўртасидаги дўстлик ва ҳамжиҳатлик ришталарини янада мустаҳкамлаб, умумий мақсад йўлида жипслаштирди. 🔴 Кези келганда таъкидлаш жоизки, хайрия ҳашари партия тизимида фақат марказий аппарат билан чекланиб қолмай, республиканинг барча ҳудудий-маҳаллий кенгашлари ва "Адолат" хайрихоҳлари томонидан ҳам уюшқоқлик билан давом эттирилмоқда. ⚖️Расмий саҳифаларимиз