Post #4397

Son illərdə Rusiya müxalifətinin və müstəqil jurnalistlərin əsas xidmətlərindən biri siyasi məhbuslara dəstək göstərmək olub. Bu, yalnız maddi dəstəyi deyil, həm də məhkumlara məktub yazmaqla onlara mənəvi dəstək göstərməyi əhatə edir. Azərbaycan vətəndaş cəmiyyəti də dəfələrlə siyasi məhbuslar və onların ailələri üçün vəsait toplama kampaniyaları keçirib, lakin mən xatırlamıram ki, kimsə vicdan məhbuslarına koloniyalar və istintaq təcridxanalarına məktublar yazmağa çağırış etsin. Halbuki, bu, çox vacib bir məsələdir və bəzən pul toplamaqdan da daha əhəmiyyətli ola bilər. Mərhum Rusiya müxalifət lideri Aleksey Navalnı və digər rusiyalı həbs olunmuş fəallər və jurnalistlər dəfələrlə xaricdən gələn məktubların onlara necə güc verdiyini vurğulayıb, və heç şübhəsiz ki, bizim siyasi məhbuslarımız üçün də bu təsir eyni olardı. Mən bizim vətəndaş cəmiyyətimizin bütün nümayəndələrinə müraciət edirəm: gəlin siyasi məhbuslara məktub göndərmə kampaniyasına başlayaq. Aralarında onlarla jurnalistin olduğu 300-dən çox insan Əliyevin zindanlarında ağır şəraitdə əziyyət çəkir. Bu addımla biz onlara unudulmadıqlarını göstərmiş olarıq. Mən hələ Azərbaycan Penitensiar Xidmətinin onlayn məktub göndərmək imkanını təmin edib-etmədiyini öyrənməmişəm, lakin təmin etməsə belə, bu ideyanın mütləq həyata keçirilməsi lazım olduğunu düşünürəm. Tənqidçilərini və müxaliflərini həbs edərək rejim bütün xalqa qorxu aşılamağa və eyni zamanda həbs olunanların müqavimət iradəsini qırmağa çalışır. Biz bu vəziyyətə mane olmaq üçün heç olmasa nəsə etməliyik.