Post #4531

Qurban Məmmədovla müsahibə I hissə Sual: Bütün siyasi fəaliyyətiniz dövründə ən böyük səhviniz nə olduğunu hesab edirsiniz? Cavab: Təbii, siyasi səhvlərim çox olub, amma bütün siyasi həyatım boyu, məncə, ən böyük səhvim 1998-ci ildə həbs olmağım idi. Mən həbs olunmaya bilərdim və o zaman baş verən hadisələri başqa cür idarə edə bilərdim ki, həbs olunmayım. Bilmirəm, onda istədiyim nəticəni əldə edə bilərdimmi yoxsa yox, ancaq həmin səhvim məni 5 il azadlıqdan məhrum etməklə nəticələndi. Həm də bu müddətdə fəal siyasi mübarizədən kənarda qaldım. Sual: Prezident Əbülfəz Elçibəy dövründə sizə dövlət orqanlarında yüksək vəzifələrdən birini tutmaq təklif olunmuşdu. Niyə imtina etdiniz? Gələcəkdən özünüzə tövsiyə verə bilsəydiniz, qərarınızı dəyişməyi təklif edərdinizmi? Cavab: Əbülfəz bəyin adından Pənah Hüseyn mənə bir neçə vəzifə təklif etmişdir: öncə, baş prokurorun birinci müavini, sonra baş prokuror, sonra isə gömrük naziri. Mən hamısından imtina etdim. Və qərarımı dəyişməzdim, çünki o zaman şərtlər elə idi ki, o şərtlərin daxilində vəzifəyə getməyim heç bir nəticə verməzdi, çünki birinci gündən qaydalar pozulmuşdu; 18 may 1992-ci ildən bütün qaydalar pozulmuşdu. Mən başa düşdüm ki, bu komanda mənim deyil. Sual: Elə bir fikir var ki, Azərbaycan da, digər postsovet ölkələri kimi, Kremlin nəzarəti altına düşməyə məhkum idi və Xalq Cəbhəsi hökuməti hər halda devriləcəkdi. Bununla razısınızmı? Sizcə, ölkənin diktaturaya sürüklənməməsi və Heydər Əliyevin hakimiyyətə gəlməsinin qarşısını almaq üçün nə etmək lazım idi? Cavab: Xeyr, mən qətiyyən elə düşünmürəm, hakimiyyəti saxlamaq mümkün idi. Sadəcə Əbülfəz Elçibəy və onun ətrafındakılar hakimiyyəti saxlamaq üçün üzərlərinə düşən bütün vəzifələri icra etmədilər. Bilmirəm qəsdən mi yoxsa necə, həqiqəti Allah bilir, amma hakimyyəti saxlamaq mümkün idi. Hətta bunu deyim ki hakimyyəti qoruyub saxlaya bilməsəydilər belə, xalqın onlara tapşırdığı əmanətə mütləq sahib çıxmalı idilər, postlarında ölməli idilər, amma postlarını tərk etməməli idilər. Mən bu düşüncədəyəm.