Post #5785

İki həftə əvvəl Bakıda Nizami Kino Mərkəzinin divarına şüar yazılmasına görə 4 gənc həbs edildi. Yandaş media, deputatlar və s. barbar bağırırdılar ki, guya memarlıq obyektinə qarşı ciddi vandallıq törədilib, halbuki həmin Mərkəzdə restoran tikiləndə və qeyri-estetik afişalar yerləşdiriləndə heç kim səsini çıxartmırdı. Bakının bir sıra mədəni və tarixi tikililərinin dağıdılması isə adi hala çevrilib və buna vandallıq deyən yoxdur. Hadisədən çox keçmədən bəlli oldu ki, bu məsələdə əsas fiqur kimi təqdim edilən gəncin bu qrafitinin yazılmasına heç bir aidiyyəti yoxdur, onun şəkilini isə qanuna tam zidd olaraq mediada yayımlandı. Bundan əlavə, bildiyimə görə, tutulanlara qarşı polis məntəqəsində zorakılıq tətbiq edilib. Yəni, bütün bu boş şou yalnız cəmiyyətə polis vasitəsilə yenidən qorxu aşılamaq üçün edilir. Çətin ki, bu mətnin oxuyanlar arasında hər hansısa bir polis olsun, amma bəlkə bu sualları onlara kimsə çatdırar. Sizə sualım var: sizə cəmiyyətdə “it” dedizdirən kimdir? Sizin həmkarınız, Samux rayon polisinin rəis müavini, öz ağzıyla demişdir ki, polis işi ən şərəfsiz işdir. Sizin işinizi ən şərəfsiz edən kimdir? Təbii ki, siz onun kimliyini çox yaxşı bilirsiniz, amma faciə ondadır ki, siz ona sadiqliklə xidmət etməyə davam edirsiniz. Bu zorakılığın sonu çox dəhşətli olacaq. Geci-tezi var.