Літаратурны музей

АФІША НА МАЙ Галоўная падзея месяца – Ноч музеяў 🌙 Мы рыхтуемся адкрыць звыклыя прасторы па-новаму і разам з вамі выйсці за межы штодзённасці🥳 Але май – гэта не толькі адна ноч. Нагоды сустрэцца будуць амаль кожны дзень. Таму калі вам усё радзей хочацца ісці дадому адразу пасля працы – часцей зазірайце ў нашу афішу. Магчыма, у адзін з выпадковых вечароў вы знойдзеце ў нас тое, што застанецца з вамі надоўга.

ФІЛАМАЦКАЯ МАЁЎКА 🔮Праект “Магія слова” 📅03 мая 2026, 16:00 📍Дзяржаўны музей гісторыі беларускай літаратуры Май багаты на святы, якія так і клічуць ў дарогу ды на сустрэчы з сябрамі. Маёўкі – адна з традыцый на беларускіх землях, якая цудоўна спрыяла такім сустрэчам. Пачуўшы слова «маёўка», многія згадаюць традыцыі савецкай моладзі. Але гэта стэрэатып апошніх дзесяцігоддзяў. Маёўкі з’явіліся значна раней. Студэнты, якія ладзілі іх больш за дзвесце год таму, – удзельнікі таварыства філаматаў. ℹ️Першая маёўка адбылася за Вільняй 6 мая 1820 года. Была яна добра падрыхтавана. Адкрыў маёўку Тамаш Зан, які выступіў са спецыяльна напісанай да яе вершаванай прамовай. Пасля выступленняў філаматаў моладзь пайшла, згодна з рытуалам, “піць малако”. Гэта была своеасаблівая вясёлая безалкагольная бяседа, дзе гучалі вершы, прамовы, спевы, жарты. Там жа наладжваліся гульні. Запрашаем у Літаратурны музей пазнаёміцца з гісторыяй і традыцыяй філамацкай кагорты: Адам Міцкевіч, Тамаш Зан, Ян Чачот, Ігнат Дамейка і яшчэ некалькі дзясяткаў найцікавейшых удзельнікаў таварыства аматараў навук. Вас чакае расповяд пра жыццё, творчасць, каханне і прыгоды адной з самых яскравых суполак у гісторыі беларускай літаратуры. 🎟10 руб. Б У Д З Е Ц І К А В А !

МУЗЫЧНА-ПЛАСТЫЧНЫ ПЕРФОРМАНС “ПАВА ЛЯТАЛА” АДБЫЎСЯ 28 красавіка прастора выставы “Павукі і павы” напоўнілася рухам, гукам і жывой прысутнасцю - тут адбыўся музычна-пластычны перформанс “Пава лятала”. Гледачы сталі не проста назіральнікамі, а паўнавартаснымі ўдзельнікамі дзеі: разам з выканаўцамі яны перамяшчаліся па экспазіцыі, уключаліся ў рытм перформанса і перажывалі працэс нараджэння новай гармоніі. Жывыя веснавыя абрадавыя спевы і сучасная пластыка стварылі адчуванне абнаўлення, у якім перапляліся традыцыя і сучаснасць. 🙏🏼Дзякуем усім, хто далучыўся і стаў часткай гэтага жывога мастацкага працэсу. 📅Выставу "Павукі і павы" можна наведаць да 12 мая 2026.

Свята (музейнай/пісьменніцкай) працы з Міхалам Бараноўскім 1 мая 2026 года, 13.00, 17.00 Загадчык Літаратурнага музея Максіма Багдановіча традыцыйна святкуе “першамай” на працоўным месцы. 13.00 – куратарская экскурсія па экспазіцыі “Музей – гэта мы”, на якой вы даведаецеся пра знакавых фондастваральнікаў музея, унікальныя экспанаты, а таксама досвед пошуку і збірання артэфактаў, звязаных з жыццём і творчасцю Максіма Багдановіча. 17.00 – Міхал Бараноўскі распавядзе пра ўласны спосаб пісання тэкстаў, радасці і складанасці стварэння літаратурных твораў, песень, кніг паэзіі і літаратуразнаўчых выданняў, а таксама пазнаёміць з дзейнасцю школы “ТЭКСТ”. Запрашаем усіх, каму цікава музейная і творчая кухня, на сустрэчу з багдановічазнаўцам, паэтам і музыкам Міхалам Бараноўскім. Уваходны квіток – 10 руб. Літаратурны музей Максіма Багдановіча Мінск, вул. М.Багдановіча, 7а

Фота - Дзяржаўнага музея-запаведніка “Астаф’ева” – “Рускі Парнас”.

24 красавіка 2026 года ў Дзяржаўным музеі-запаведніку “Астаф’ева” – “Рускі Парнас” (г.Масква) адбылося адкрыццё літаратурна-дакументальнай выставы "Крывёю сэрца", прысвечанай беларускім пісьменнікам-удзельнікам Вялікай Айчыннай вайны. У мерапрыемстве прынялі ўдзел намеснік дырэктара па навуковай рабоце Дзяржаўнага музея гісторыі беларускай літаратуры Алеся Кузняцова і загадчык навукова-асветніцкага аддзела Валянціна Кароткіна.

У ФІЛІЯЛЕ «БЕЛАРУСКАЯ ХАТКА» ПРАЙШЛА ДЫЯЛОГАВАЯ ПЛЯЦОЎКА ДА 140-ГОДДЗЯ З ДНЯ НАРАДЖЭННЯ ЗМІТРАКА БЯДУЛІ 24 красавіка 2026 года ў філіяле «Беларуская хатка» Дзяржаўнага музея гісторыі беларускай літаратуры адбылася дыялогавая пляцоўка, прысвечаная 140-годдзю з дня нараджэння класіка беларускай літаратуры Змітрака Бядулі. Мерапрыемства стала значнай культурнай падзеяй, якая аб’яднала навукоўцаў, літаратараў і ўсіх аматараў беларускай літаратуры. Яна яшчэ раз пацвердзіла, што творчасць Змітрака Бядулі застаецца актуальнай, а яго слова працягвае гучаць у сучаснай культурнай прасторы. Падрабязней

«ВЯСНОВЫ ФЭСТ» У РАКУЦЁЎШЧЫНЕ 18 красавіка 2026 года ў філіяле «Фальварак Ракуцёўшчына» адбыўся першы «Вясновы фэст». Ён стаў прасторай жывой традыцыі, дзе можна было адчуць сувязь з народнай культурай, навучыцца новаму і правесці час у атачэнні творчых і натхнёных людей. Дзякуем усім, хто быў з намі ў гэты дзень! Да сустрэчы на наступных святах! Больш фота на нашым сайце

ДА ПОМНІКА ЗМІТРАКА БЯДУЛІ НА УСХОДНІХ МОГІЛКАХ УСКЛАЛІ КВЕТКІ 23 красавіка 2026 года, у 140-гадовы юбілей з дня нараджэння пісьменніка Змітрака Бядулі, да яго надмагільнага манумента на Усходніх могілках Мінска былі ўскладзены кветкі. Падчас урачыстасці прагучалі шчырыя, пранікнёныя словы ў гонар выбітнага майстра слова ад прадстаўнікоў Дзяржаўнага музея гісторыі беларускай літаратуры, Дзяржаўнага літаратурна-мемарыяльнага музея Якуба Коласа, Беларускага дзяржаўнага архіва-музея літаратуры і мастацтва, Інстытута літаратуразнаўства імя Янкі Купалы Нацыянальнай акадэміі навук Беларусі. Ушанаваць памяць класіка сабралася і шырокая грамадскасць. Да цырымоніі далучыўся аўтар манумента – скульптар Сяргей Гумілеўскі. Мерапрыемства стала сімвалічным актам павагі да спадчыны пісьменніка і яго значнага ўнёску ў развіццё беларускай літаратуры.

МАЙСТАР-КЛАС ПА ПЛЯЦЕННІ АВОСЬКІ 26/04/2026, 14:00 📍Філіял "Літаратурны музей Петруся Броўкі" Час вяртацца ў мінулае, каб стварыць трэнд будучыні! Літаратурны музей Петруся Броўкі запрашае на майстар-клас па стварэнні авоські. Так, той самай гаспадарчай сумкі-сеткі, якая была сімвалам савецкай эпохі і практычнасці. Чаму менавіта авоська? Бо гэта не проста ўпакоўка, а культурны код ХХ стагоддзя. Але тое, што калісьці было сімвалам эканоміі, сёння вярнулася на п’едэстал моды, бо ў ХХІ стагоддзі авоська – гэта экалагічны, зручны і вельмі стыльны аксэсуар. Матэрыялы выдаюцца, настрой ствараецца. Чакаем вас у невялікай, але вельмі цёплай кампаніі! 🎟40 руб. ✍🏽Запіс па тэл. +375 17 342-09-81 (колькасць месцаў абмежаваная). Наш адрас: г. Мінск, вул. К.Маркса, 30.