DALA INSIDE

💥Путиннің арманы орындалады: Жаңа Қазақстан "газ одағын" құруға қадам жасады... Qazaq Gaz ұлттық компаниясы "Газпромның" алдына өзі барды. Біздікілер ресейлік монополиске 🇨🇳 Қытайға жетіп жығылатын жаңа газ құбырының құрылысын жүргізуді ұсынған. Мәскеу мен Бейжіңнің арасын жалғайтын жаңа транзитті бағыт Қазақстанның аумағын басып өтеді. Qazaq Gaz осының есебінен еліміздің шығыс өңірін газдандырып алмақ. "Шығыс Қазақстанның территориясын түгел қамтитын транзиттік бағыт тек осы өңірмен шектеліп қалмай, оған жапсарлас орналасқан аймақтарға да септігін тигізеді. Жобаның кем-кетігі жоқ, екшеліп-текшелді, есеп-қисабы жасалды...", - дейді Qazaq Gaz-дағылар. Ресейлік компания қазақтардың ұсынысын бірден қабыл алмай, ойланып-толғануға мұрсат сұрапты. Есесіне ресейлік телеграм-арналар малақайын аспанға атып, алақай жаңалықты Путиннің кезекті жеңісіне балауда. "Бұл келісім екі елдің Үкіметі деңгейінде әлдеқашан шешілген. Қазақтардың теріскей пен шығысты өз газымен қамтамасыз ететін қауқары жоқ. Әдеттегідей, біз оларға қол ұшын созамыз...", - дейді ресейлік пропаганда. Батыс жаңарақта ғана "Газпромның" бірнеше топ -менеджерін санкциялық тізімге енгізді. Dalainside мұны "газ одағын" құрудың бастамасы деп санайды. Бұл дұрыс па, бұрыс па дегенді оқырманның еркіне қалдырайық. Айтқандай, бүгін Ресейдің "Дружба" құбыры арқылы қазақ мұнайының алғашқы партиясы 🇩🇪Германияға жөнелтілді. "ҚазТрансОйл" 20 мың тоннадан асып жығылатын мұнайды "Дружбамен" қуалап әкеп, Польшадағы "Адамов заставасы" қабылдау пунктіне жеткізіп береді. Ресей бұл транзит үшін тәп-тәуір төлем алады, әрі мұнай құбыры да қаңырап тұрмайды. Ал, "газ одағының" жай-жапсарын алдағы күндері айтатын боламыз. Арнаға тіркеліп алыңыз👇 https://t.me/dalainside

🏥Биылдан бастап Қазақстанда медицина орталықтары жабыла бастамақ Коммерциялық медицина саласын банкроттық күтіп тұр. Ulagat Consulting Group жүргізген зерттеу 2023 жылы саланың басым бөлігінің банкротқа ұшырау қаупін көрсетеді. Өйткені, медицина қызметкерлерінің жалақысын көтеру мәселесі мемлекет тарапынан жеткілікті қаржыландырумен қамтамасыз етілмеген. 2020-2021 жылдары медорталықтардың жалпы шығынында жалақы үлесі 51-52 пайызға жеткенде, мемлекеттің медицинаға деген шығындары өскен болатын. Мысалы, ГОБМП 36 пайызға, ал ОСМС 42 пайызға өсті. 2022 жылдан бастап мемлекет медицина қызметкерлерінің жалақысын тағы 25%-ға көтеруді талап етіп отыр. Бірақ ГОБМП, ОСМС тарифтерін ұлғайтпады. Сонда жекеменшік медорталықтар айлықты өз қалтасынан 25 пайызға өсіруі тиіс. Бұл ретте олардың жалақыға деген шығындары жалпы шығын үлесінде 67%-ға жетпек. Ulagat Consulting Group жүргізген сауалнамаға сай, Қазақстандағы жекеменшік медорталықтарының 47 пайызы 2022 жылды шығынмен аяқтаған. Ал 2023 жылы шығынға бататын медициналық орталықтар үлесі 71,5 пайызға жетеді. Олар жаппай жабыла бастаса, азаматтарды емдейтін жер таппайтын боламыз. https://t.me/dalainside

📈Базалық ставка: түсе ме, түспей ме? Бүгін Ұлттық Банк базалық ставка бойынша кезекті шешімін жариялайды. Қазіргі деңгейі 16,75%. Және біздің ойымызша ол өзгеріссіз қалады. Инфляциялық күтулер деңгейі төмендесе де, қаңтар айында нақты инфляция құламаған. Сондықтан жоғары базалық ставканың эффектісі әлі білінген жоқ. Дәл қазір ставканы төмендету оған дейін жасалған барлық жұмысты бұзып тастайды және біз инфляцияны ауыздықтай алмай қаламыз. Кеше биржада ұлттық валюта аздап әлсіреді. USD/KZT жұбының орташа бағамы бір долларға 448,99 теңгені құрады. Оның алдындағы бағамына 2,13 теңге қосқанын көрдік. Биржа үшін салық аптасының әсері аяқталды деуге толық негіз бар. Себебі, долларды сату көлемі 88,7 миллион долларға дейін төмендеді. Оның алдында биржада күніне 130 миллион доллардай сатылып келген еді. UPD. Ұлттық Банк базалық ставканы сол 16,75% межесінде қалдырды https://t.me/dalainside

🇨🇳Бүгіннен бастап Қытай әлемдегі "халық саны ең көп ел" статусын жоғалтты 2022 жылдың қортындысы бойынша Үндістан халқының саны World Population Review (WPR) мәліметтері бойынша 1,417 миллиард адамды құрады. Бұл Қытайдағы көрсеткіштен 5 миллион адамға көп. Ал Қытайдағы халық саны - 1,412 миллиард адам. Қытайда 1959-1961 жылдардағы ашаршылықтан кейін халық саны алғаш рет азайып отыр. Және бұл азаю өз қарқынын күшейткен. Ол Компартияның алаңдаушылығын туғызды. Жас отбасылардың бала туу көрсеткіші азайған және келіншектердің күйеуге шығуға деген ынтасы төмендеп кеткен. "Чайлдфри" пропагандасы да күшейген. Еңбекке қабілетті адам санының қысқаруы Қытай экономикасына соққы болып тимек. Жұмыс күшінің құны артып, халықаралық компаниялар өз өндірісін Қытайдан Үндістан, Бангладеш, Индонезия мен Вьетнам сияқты жұмыс күші көп, әрі арзан елдерге ауыстыруы мүмкін. Бұл өз кезегінде әлемдегі логистика картасын өзгертеді. Қазақстан экономикасы үшін Қытай экономикасының өсе бергені тиімді. Себебі, ондағы тұтынудың артуы біздің экспорттық табыстарымызды қамтамасыз етіп келді. Ал Үндістанмен аса қатты байланысымыз бар деуге келмейді. Себебі, ортақ шекара жоқ. https://t.me/dalainside

🇰🇿🇺🇸Тоқаев Байденнің мәлімдемесін мұқият тыңдады: Жаңа Қазақстан Киев пен Мәскеудің үстел басына отырғанын қалайды... Dalainside Байденнің Варшавадағы жолдауын зейін қоя тыңдады. АҚШ президенті Кремль көсемі ұқсап толғатып жатпады. Ұзын-сонар баяндамадан бас тартқан Ақ үй басшысы Украинаға келгенде бір адым кері шегінбесін кесіп айтты. Компромиске жол жоқ, Мәскеу Батыстың алдында тізе бүгуі керек. АҚШ пен оның одақтастары Киевті жау қолында қалдырмайды. Ал, Путиннің ақыры - Гаагамен аяқталады. Ресей диктаторы мен жанындағы жендеттер тегіс жазаға тартылып, түрмеде шіриді. Мұндай азаптан арылудың жалғыз амалы - Путинге опасыздық жасау, Батыспен ымыраласып, Кремль көсемінің қылмысын әшкерелеу. "АҚШ-тағы әрбір үйдің маңдайшасында 🇺🇦 украин туы ілулі тұр", - деп түйіндеді сөзін Байден. Батыс осы арқылы Кремльге күшті психологиялық месседж жолдады, қазақша айтқанда "артыңды қыс..." деген белгі берді! Dalainside "Тоқаев Байденнің мәлімдемесін мұқият тыңдады..." деуі тегін емес. Жаңа Қазақстан Киев пен Мәскеудің тездетіп үстел басына отырғанын қалайды. Тараптардың бітімге келуіне шын мүдделі. "Кеселді түйін шешілсе" дейді. Оның экономикалық сипаты бар: Путиннің кесірінен Украина Ресейдің энерго-инфрақұрылымына байланған 🛢 мұнайдың барлық сортынан бас тартты. Cалдарынан Каспий құбыр консорциумы арқылы тасымалданатын (негізінен Теңіз, Қарашығанақ және Қашаған кен орнынан шығатын) мұнай Одесса портына жеткізілмейтін болды. Қазір бұл жердегі терминал шикізатты АҚШ-тан алады. Украинадағы мұнай өңдеу зауыттары ресейлік инвесторлардан толық "тазарған". Киев қазақ билігімен ара-қатынасы тәуір деген "Лукойлдың" инвесторларын Одессадағы мұнай өңдеу зауытынан қуып шықты. Бұл өз кезегінде қазақстандық шикізатқа деген сұранысты шектеп, елдің экспорттық әлеуетіне теріс әсер етті. Еліміздегі көмір өнеркәсібі де соғыстың кесірінен еңсе тіктей алмай отыр. Ресей соңғы 7-8 жылдың бедерінде қазақ көмірін Украинаға транзиттеуге кедергі келтіріп келеді. Соғыс басталғалы бері Қазақстан мен Украина арасындағы алыс-беріс 40 пайызға қысқарған. Dalainside-тың тұжырымын Сыртқы істер министрі Мұхтар Тілеуберді де растап отыр. Әзірде ғана Португалияның Diário de Notícias басылымына сұхбат берген Тілеуберді Путин шапқыншылығы ел экономикасын есеңгіретіп кеткенін мойындады. "Санкция? Қазақстан Батыстың шектеуіне қосылмайды. Бұл Ресейге жәрдемдескеннің белгісі емес. Еліміздің аумағын санкцияны айналып өтетін алаңға айналдырмаймыз...", - деп алып-қосты министр. Айтқандай, Ресейдің "Дружба" құбыры арқылы Берлинге мұнай жөнелтпек болған қазақ билігі берілген уәдені созып, сөзбұйдаға салып отыр. Мұның саяси себебі бар ма? Оны алдағы уақытта анықтаймыз. Арнаға тіркелуді ұмытпаңыз👇 https://t.me/dalainside

🏦Jusan bank әдеттегі жұмысын жалғастыра береді "First Heartland Securities" акцияларына Алматы қаласы Бостандық аудандық сотының шектеу қою банк қызметіне кедергі келтірмейді. 🇰🇿 Қазақстан Республикасы Бас Прокуратурасының мәлімдемесінде айтылғандай, Jusan тобы құрылымдарының біріне қатысты азаматтық талап-арыз қаралуда. Оның аясында акцияларды уақытша шектеу сынды стандартты рәсімдер мен процессуалды әрекеттер жасалды. "Jusan bank" АҚ баспасөз қызметі азаматтық талап тек Банктің шетелдік акционерлеріне қатысты екенін және Банк қызметіне, сондай-ақ серіктестермен немесе халықаралық корреспондент-банктермен, халықаралық төлем жүйелерімен жасалатын қарым-қатынасқа әсер етпейтінін алға тартады. Банк әдеттегідей еш шектеусіз жұмыс істей береді. Jusan Bank тікелей немесе жанама түрде де жауапкер немесе соттасып жатқан тарап болып табылмайды. Сондықтан Банкке ешқандай санкциялар қолданылмайды. Jusan Bank және оның активтері Қазақстанда орналасқан. Банк қаржылық жағынан тұрақты. Ол Қаржы нарығын реттеу мен дамыту агенттігінің барлық нормаларын асыра орындап отыр. Сондықтан Бас Прокуратура да "Jusan" тобына қатысты арызының Jusan Bank қызметіне қатысы жоқтығын атап көрсетті 👉 www.gov.kz Jusan Bank өз қызметін әдеттегідей жалғастыра береді. Клиенттер алдындағы барлық міндеттемелер орындалады. ҚР Қаржы нарығын реттеу мен дамыту агенттігі де қаржы институтының тұрақтылығын және банктің барлық заң талаптары мен пруденциалды нормативтерге сәйкестігін растады 👉www.gov.kz/memleket https://t.me/dalainside

⚡️ Жастар сөйлей бастады! Олар Жаңа Қазақстанда өмір сүргісі келеді... Елімізде Мәжіліс пен мәслихат сайлауына түскелі отырған жас кандидаттарды қолдайтын "Жастар үні" блогы құрылды. Бұл туралы журналистер Ерқанат Көпжасар, Ақбөпе Тәңірберген, Нұрсұлтан Құрман және Мәжілісі депутаттығына үміткерлер Яков Федоров пен Мақсат Халық жария етті. "Ашық алаң" саяси ток-шоуының жүргізушісі Ерқанат Көпжасар айтуынша ұйымның қатарына жас кандидаттарды қорғаймын, қолдаймын, кеңес беремін деген белсенді жастар еш кедергісіз кіре алады. "Мақсатымыз – халық қолдауына ие белсенді жастарды Мәжіліс пен мәслихат сайлауына қатысуға шақыру", - дейді ол. Танымал блогер Яков Федоров қазақстандық жастарға қатысты стереотиптерге тоқталды: "Жастар саясатқа қызықпайды деген стереотип бар, алайда бұл олай емес. Бұған дейін жастарда мүмкіндік пен таңдау болмады. Қазіргі уақытта кез келген азамат өзін-өзі ұсына алады. Ең бастысы – жастар өзгеріс енгіземін деген шын ниетімен бара жатыр", - деді ол. Экономист, Мәжіліс депутаттығына үміткер Мақсат Халық партиялардан жасалып жатқан қолдауға тоқталды. "Шыны керек, бізді бірде-бір партия қолдап жатқан жоқ, "Аманат", "Ауыл", "Республика" партиясы болсын. Сондықтан да, қазіргі уақытта өзімізді ұсынып, болашаққа үлес қосамыз деген ниет бар. Әрине, өңірлерде әділетсіздік орын алатын шығар, бірақ өзгерістерді өзіміз жасап, Қаңтардан бастап айтылып келе жатқан 🇰🇿 "Жаңа Қазақстанды" бірге құру керекпіз", - деп атап өтті. "Жастар үні" жас кандидаттарды қолдау блогы – өз-өзін бір мандаттық жүйемен ұсынғандарды да, партия атынан ұсынылып отырғандарды да бөліп-жармай қолдауға дайын. Бастысы 21-35 жас аралығындағы жастар санатына жататын азаматтар болуы тиіс. #ақылынегізде

👊🏦Назарбаев күресі. "Jusan bank"-тен айрылмас үшін зейнеткер өз елін сотқа берді 🇺🇸 АҚШ-та тіркелген "Jysan Holding" компаниясы Қазақстан Республикасының үстінен Невада штатының округтық сотына арыз түсірді. Енді Қазақстан атынан Әділет министрлігі адвокаттар жалдап, осы сот процесіне де шығындалуға мәжбүр болады. "Jysan Holding" өз кезегінде "New Generation Foundation" қорына қарайды. Бұл қор өткенде ғана "NU (Nazarbayev University) Generation" деп аталатын. Назарбаевтың атын Жусанға қатысты барлық жерден алып тастау операциясы аясында қордың аты өзгерді, оның басшылығынан Қазақстан азаматтары, кезінде Назарбаевтың жанында жүрген көмекшілері Ербол Орынбаев, Аслан Сәрінжіпов, Рүстем Хамзин, Евгений Пан түгел кетіп қалды. Оның орнына басқармаға американ лоббистері келді. 2000 жылдары бізде Білім және ғылым министрі болған Нұралы Бектұрғанов қана қалды. Бірақ ол да АҚШ азаматы. Формалды түрде, Назарбаев та, оның көмекшілері де еш жерде емес, Жусан тақырыбына мүлде қатысы жоқ. Ал енді ішіне банк те, басқасы да кіретін "Jusan" тобы қандай американдықтардың қолына түсті? Джоел МакКлири - кезінде АҚШ Президенті Джимми Картердің көмекшісі болған. Кәрім Мәсімовтың "Следующий властелин мира" кітабына рецензия жазған. Қызметі аса қымбат тұрады. Бірақ өте ықпалды лоббист, Жусан банктен айрылған жағдайда Қазақстанның қаржы жүйесіне санкция салу бойынша бастама көтеріп, біздің елді есеңгіретіп тастауға қуаты бар. Амитабха Мукерджи - Назарбаевтың көп жылдан бергі сыйласы, оның атындағы университетті басқарып отырған Шигео Катсудың әріптесі болып келеді. Дамушы елдерге реформа жасау бойынша кеңес береді. Өзі Дүниежүзілік банкте істейді. Роберт Армао - әккі саяси лоббист. Оның компаниясы Nike, Microsoft, Coca-Cola сынды алыптарға қажет заң жобаларын Конгресстен өткізіп беруге көмектеседі. Вашингтондағы кез-келген ит Армаоны таниды. Рон Вахид - ресми түрде ол "New Generation Foundation" басқармасына кірмейді. Бірақ британдық "Jusan Technologies" басшылығында болған. Ол бейресми ЦРУ деп аталып кеткен "Arcanum Global" агенттігінің қожайыны. Кезінде Назарбаевқа Әбіләзовтың бүкіл әлем бойынша жасырылған активтерін тауып беруге көмектескен болатын. DALA INSIDE инсайдерінің сөзінше, Назарбаев пен "Жусан" қаржылық тобы туралы жазған қазақстандық ақпараттық сайттарды (Orda, Ulysmedia, Nege, ҚазTAГ) хакерлік шабуылмен шырылдатқан да дәл осы "Arcanum Global" агенттігі. Ал қазір журналистерді қорқытып үркіту, оларға шошқаның кесілген басын жіберу, есіктерін пенамен жауып тастау, балаларының суретін жіберу, көліктерін өртеу секілді лас әрекеттердің де дәл осы Жусан тақырыбына тікелей қатысы бар. Назарбаевқа жұмыс істейтін американдықтар Қазақстандағы "Jusan bank"-тен 387 миллион доллар дивиденд шығара алмай отыр. Заңға енген өзгертулер бойынша, егер банк мемлекеттен көмек алса, сол көмекті қайтармайынша ол қожайындарына дивиденд төлей алмайды. Ал Жусан банк қазақ еліне 2,6 миллиард доллар қарыз. Тек қарызды қашан қайтарады және қайтара ма? Әңгіме сонда. Банк қарызын қайтарғаннан кейін, мемлекеттің онда шаруасы да болмайтын сияқты. "Jusan bank-тың" жыры ұзаққа созылатын сыңайлы. Арнамызға тіркеліп алыңыз👇 https://t.me/dalainside

🔥 "Мәсімов Ақорданың жертөлесінде жатты...". ҰҚК-ның экс-төрағасын қорғаштап отырған америкалық лоббист жайлы не білеміз? Dalainside Мәсімов ісіндегі қалтарыста қалған нюанстерге үңіледі. Алғашқы тарауда 👆 "мұрттының" АҚШ-та тіркелген баспа үйін басқарған, әрі осы жерден шыққан Мәсімовтың кітаптарын таратумен айналысқан Ксения Крупенко туралы айтқанбыз. Оның Кәрімнің адамы екенінде күмән жоқ, әйткенмен Мәсімовтің ісіне ықпал етуге Крупенконың саяси салмағы жетпейді. Бұл миссия - оған қарағанда әлдеқайда көлемді калибрлерге, соның ішінде Ақ үйдің маңындағы саясаткерлерге жүктелген. Соның бірі - АҚШ Мемдепартаменті мен Қауіпсіздік кеңесінің экс-қызметкері Дэвид Меркель. Кейбір дереккөздің мағлұматы бойынша Меркель Nazarbayev University директорлар кеңесіне де кіріп алған. Трансұлттық компаниялардың лоббиімен айналысатын Меркельді өткен жылдың сәуірінде 💰 Шеврон компаниясы Қазақстан бойынша кеңесші етіп жалдапты. Intelligence Online таратқан мәліметке сәйкес - Шеврон Мәсімовтің басынан бақ таяды деп күтпеген, елдегі ең ірі инвестор мен Ақорданың арасындағы келіссөзде Мәсімов делдал есебінде жүрген. Былайша айтқанда, мұнай-газ саласындағы ірілі-ұсақты түйткілдер "мұрттының" көмегімен реттелген. Соған қарағанда Меркель Назарбаев әулетіне де бөтен емес. Dalainside-қа белгілі болғандай karimmassimov.com сайтының "админі" де осы кісі. Сайттың қазақ-орыс нұсқасы жоқ, тек ағылшын тілінде тарайды. Тіркелген жері - 🇺🇸 Аризона штаты, Феникстің іргесіндегі Скоттсдейл дейтін шағын шаһар. Дәл осы жерде Меркельге тиесілі Summit International Advisors компаниясы орын тепкен. Меркельдің өткен-кеткеніне үңіліп жатпайық. Ақ үйдегі ықпалдылармен әмпей-жәмпей екенін ілгеріде айттық. Бізге оның қазіргі риторикасы қызық. Ол Мәсімов қамауға алынғалы Жаңа Қазақстанды жатпай-тұрмау жамандаумен келеді. Айтуынша, Мәсімовтың тұсында Ақорда АҚШ пен Батыстың, Қытай пен Ресейдің бабын тауып, сыртқа саясатты сауатты жүргізген. Қазақстандағы президент сайлауы сүреңсіз өткен, саяси реформа жүргізуге серт берген Тоқаев косметикалық өзгеріспен шектелген. "Мұрттыны" қуғын-сүргінге ұшырату арқылы өз репутациясын ойсыратқан. "Ақорданың қолында оның Қаңтар оқиғасына қатысы барын растайтын айғақ жоқ. Мәсімов Қауіпсіздік кеңесінің отырысы аяқтала салысымен іле-шала қамауға алынды. Аш-жалаңаш күйінде, ресми айып тағылғанша Ақорданың жертөлесінде жатты. Ас-судан айырды, табанынан сыз өтті, тиісті ем-дом көрсетілмеді...", - деп дабыл қағады Меркель. DALA INSIDE оның сөзін сөйлеуден аулақ. Қазақтілді аудитория Мәсімовке әлдеқашан әділ бағасын берген. Ал Жаңа Қазақстан үшін Мәсімовтың қорғаушысы бас ауруға айналатын түрі бар. Меркельдің мәлім еткеніндей АҚШ Мемдепартаментідегі ықпалды тұлғалар ҰҚК-ның экс-төрағасына бостандыққа берілуін талап еткен. Бұлардың босағасын тоздырған Меркель "мұрттының" үгіт-насихатын жүргізгенге ұқсайды. Меркельден тағы бар маңызды инсайд: Мәсімов Батыс пен АҚШ-қа сыйлы. Dalainside-қа жеткен мәлімет бойынша алдағы уақытта Мәсімовті дәріптейтін ағылшынтілді медиа агенттіктер көбейеді. Америкалық лоббист Мәсімовті Қаңтар құрбаны ретінде көрсетуді көздейді. ❗️Анығы, алыс құрлықта Мәсімовтің мәселесіне бей-жай қарамайтын ықпалды күш бар. "Мұрттыны" қорғаштаған Меркель кімдердің алдына барды? Бұл туралы зерттеудің 3-ші тарауында кеңінен сөз етеміз. Арнаға тіркеліп алыңыз👇 https://t.me/dalainside

💥Мәсімовтің украин сыбайласы: сіз кімсіз, Крупенко ханым? Қаңтар оқиғасын ушықтырды, мемлекетке опасыздық жасады деп айыпталған Мәсімовтың cіз бен біз біле бермейтін құпиясы көп. Dalainside ҰҚК-ның экс-төрағасы туралы жиынтығы 3 тараудан тұратын зерттеу материалын ұсынады. Қазақтілді ортада "қияқ мұрт" атанып кеткен Мәсімовтің экс-президентке еліктеп кітап жазатын әдеті бар-тын. Біз оның комитетті басқарып тұрған тұста "Amanat" деп аталатын баспа үйін ашқанын анықтадық. Атауы қазақша болғанмен, жағрафиясы Қазақстаннан жырақта – Вашингтонда тіркелген. Баспа үйінің қоныс-мекені етіп 🇺🇸 АҚШ астанасын таңдап алуы тегін емес. Алыс құрлықта Мәсімовты қолдайтын ықпалды лобби бар. Бұған сәл кейінірек тоқталамыз, "Amanat-қа" қайтып оралайық. Баспаның корпоративтік сайты жып-жылмағай, күдік туғызарлық дәнеңе жоқ. "Amanat" өзін ешкімнің сөзін сөйлемейтін, дербес компания ретінде таныстырады. "Сұранысқа ие үздік туындыларды жариялауға әркез даяр екенін" мәлімдейді. Солай бола тұра, осы күнге дейін баспадан небәрі 3-ақ кітап жарық көрген. Түсінген боларсыз, үшеуі де Мәсімов әулетіне тиесілі. 📚 "Amanat" баспасынан Мәсімовтың - "Тамыр" және "Әлемнің келесі қожайыны: жасанды интеллект" атты кітабы басылып шыққан. Ал үшінші кітаптың егесі – Кәрімнің әкесі марқұм Қажымұқан ақсақал. "Естеліктер" деп аталатын кітапта Мәсімовтер әулетінің өткені мен кеткені баяндалған. Dalainside бұдан да тереңге үңгіп, Мәсімовтің АҚШ-тағы сыбайласын тапты. ҰҚК-ның бұрынғы басшысының төл туындыларын кеңінен таратуға, әрі оның АҚШ-тағы жағымды образын қалыптастыруға 🇺🇦 Украин азаматы болысып отыр. Аксения Крупенко украин тумасы және біздің болжам бойынша Мәсімовке тиесілі "Amanat" баспасына тікелей қатысты тұлға, тіпті осы баспаның қожайыны болуы да ғажап емес. Баспа үйінің веб-сайтында оның есім-сойы жоқ, алайда құрылтайшылардың құжатында – Крупенко мекеменің белді қызметкері деп көрсетілген. Мәсімовтың қолымен жазылған туындыларды АҚШ-тағы ығай мен сығайға тарату жұмысы тікелей Крупенкоға жүктелген деуге негіз бар. Аксенияның құзіреті мұнымен шектелмейді. Dalainside оның әлемжелідегі парақшаларын ақтарып, келесідей қызықты мағлұмат тапты. Крупенко Мәсімовтың дәуірлеп тұрған шағында Вашинтонға түрлі мақсатпен ат сабылтып келетін шенеуніктер мен дипломаттарға арнап агенттік ашқан. Былайша айтқанда, VIP клиенттерге қызмет көрсеткен. Оларға оққағар ұсынған, қонақ үйге орналастырған, ат-көлігі мен ас-суын қамдаған. Баспаның корпоративтік құжатында Крупенкодан өзге Мәсімовтың ұлы - Ескендір Кәрімнің де аты-жөні жүр. Әлбетте, Крупенко Мәсімовтың хәлі мүшкіл екенін жақсы біледі, оған жанашыр екені жасырын емес. Украинаға басып кірген Путин Крупенконың "Кәрімге қол ұшын созсам..." деген жоспарын бұзған тәрізді. Ксения атажұртына жәрдемдесуге білек түре кіріскен. Оның ұйытқы болуымен Украинаға гуманитарлық көмек жөнелтетін арнайы қор құрылыпты. Әлбетте, мұнысы құптарлық іс. Десе де, бізді Мәсімовтың мәселесі көбірек қызықтырады. Dalainside анықтағанындай Крупенко Мәсімовтың төл туындыларын АҚШ-тың ішкі-сыртқы саясатын айқындайтын бірталай ықпалды тұлғаларға арнайы тарту еткен. Осыған қарап-ақ америкалық элита да өз тарапынан "мұрттымен" байланыс орнатуға мүдделі болғанын аңғарамыз. Әлгі кітаптар бұл арада "орамал тон болмайды, жол боладының" деген ишараның рөлін атқарып тұр. Сонда мұның түпкі мәні неде? Кәрімнің көңілін табуға тырысқандар нені көздеді? Ілгеріде айтқанымыздай, алыс құрлықта Мәсімовтің мәселесіне бей-жай қарамайтын мықты лобби бар. Мәсімовке кімдер араша түсуде? Бұл туралы зерттеудің 2-ші тарауында кең-молынан сөз етеміз. Арнаға тіркеліп алыңыз👇 https://t.me/dalainside

⚡️"Ескі Қазақстан" мен "Жаңа Қазақстан" сотта кездесті Бүгін "JYSAN HOLDINGS" халықаралық акционерлері Қазақстанды сотқа берді. Қазақстанға қарсы американдық "Willkie Farr & Gallagher LLP", "Holland & Hart LLP" заң фирмаларының тәжірибелі заңгерлері - Тарик Мундия, Майкл Готтлиб, Джеффри Б., Дж. Стивен Пик пен Эрик Медлилер соттасатын болады. Оның алдында Қазақстанның Бас Прокуратурасы «Pioneer Capital Invest» ЖШС мен Jusan Technologies Ltd арасындағы «First Heartland Jusan Bank» банкінің, сондай-ақ онымен байланысты ұйымдардың активтерін шетелдік юрисдикцияларға беру туралы шартты жарамсыз деп тану туралы талап арызын жариялаған болатын. Ал Алматы қаласы Бостандық ауданының соты Прокуратура арызы бойынша іс қозғаған. Jusan Technologies Ltd - АҚШ-тың Невада штатында тіркелген компания. Ол біздегі Жусан банктің қожайыны болып табылады. "Жаңа Қазақстан" Жусан банкті өзіне қайтарып алғысы келеді. Бірақ оған артында Назарбаев тұрған "Jusan Technologies Ltd" түбегейлі қарсы. Невада соты керек деп тапса, Қазақстанның 💰 Ұлттық Қорын блоктап тастай алады. Жусан ісі - біз үшін екінші Стати деуге болады. Анатол Стати Қазақстанның ERG корпорациясынан алатын дивидендін бұғаттап тастады. Невада соты да біз үшін оңай болмайын деп тұр. Dalainside бұл даудың барысын бақылауда ұстайды. Арнаға тіркеліп алыңыз👇 https://t.me/dalainside

🏰Кремль қазақ телеграмына көз салды DALA INSIDE "иноагент" деп танылуы мүмкін. Бұл туралы, Роскомнадзордағы дереккөзіміз хабарлайды. Бүгін Ресейдегі Федерация кеңесінің төрайымы Валентина Матвиенко Ресейге сыни көзбен қарайтын телеграм арналарды "дұшпан" деп арнайы белгілеуді ұсынды. Бір қызығы, әңгіме Ресейдің ішіндегі арналар емес, жалпы Ресей туралы жазатын, жазған барлық телеграм арналар туралы болып отыр. Роскомнадзор ол жұмысты өткен жылдың қарашасынан бері бастап кеткен болатын. Қазір оларды аса қызықтырып отырған 500-ден аса телеграм арналардың базасы құралды. Украин, қазақ, өзбек тілді арналарды да зерттеу қолға алынған. Қазақтілді посттарды Россотрудничествомен жұмыс істейтін, Алматыда орналасқан екі үкіметтік емес ұйым аударып, Мәскеуге жіберіп отыр. Әзірге қазақтілділерден DALA INSIDE, PARANOIA, Usbanov ARNASY, Ongar Online телеграм арналарына мониторинг жасалуда. "Біздің Ресейдегі билеуші режимнің басқыншы әрекетін сынап, саралап жазуға толық құқымыз бар. Бірақ ол біз Ресейдің мемлекеттілігіне, әсіресе халқына дұшпанбыз деген сөз емес. Жалпы, билік пен елді шатастырмау керек. Екеуі екі бөлек ұғым. Путиндер келеді, кетеді. Бірақ, Ресей қалады. Бізге мұндай көршіміздің бейбіт, тыныш болғаны керек. Оның біздің де қауіпсіздігімізге әсері бар", - деді DALA INSIDE бас редакторы Думан Бықай. Мәскеу алдымен Украина бойынша жазатын орыстілді қазақстандық сайттарға тиісе бастаған еді. Қазақтілді контентке де кезек келген сияқты. Бірақ, DALA INSIDE Ресей юрисдикциясына бағынбайтындықтан, оны қалыпты жағдай деп қабылдап, алаңсыз жұмысын жалғастыра бермек. Пропагандаға бірге қарсы тұрамыз, арнаға тіркелуді ұмытпаңыз👇 https://t.me/dalainside